Mokokchung Town Lanur Telongjem-i Mkg DC dang mepelar

Mkg, March 10 (TYO): Mokokchung town nung Govt. primary school ka nungi tanurtem anüngdang chiyongtsü asoshi agütsüba jang tamajung putetba mapa inyakertem anema Mokokchung Deputy Commissioner, Sushil Kumar Patel-i ola adokbaji taoksatsüka aser tejashitsüka lir, ta Mokokchung Town Lanur Telongjem (MTLT)-i metetdaktsüogo.
Brehostibar aonung 7:35 ako nung All India Radio Kohima ajanga Mokokchung DC-i kija mesüra teloki school ama tesem mita aobaji ozüngi memelar anungji ozüng raksaba mapa ka asütsü ta sangdongba osang angashia aoksar aser kanga jashir, ta lanurtemisa metetdaktsü.
Mokokchung town nung aliba school-tem nung tanurtem chiyongtsü asoshi jang tamajung agüja lir ta aruba osang jangjashitsü asoshi school-tem semdanga aobaji mita aoba masü saka tanurtem nem chiyongtsü tamajung agütsüba osangji angashir mangashi akümtsüla mapa ka masüba agi inyakba liasü, ta MTLT-isa metetdaktsü.
School-tem nung tanurtem anüngdang chiyongtsü agütsüba jang nung mesen dena lir aser nisung chiyongtsülabo masü ta osang aruba agi lanurtemi iba osangji jangjatsü atema school-tem semdanga ao saka mita ao masü, kechiyong school-temji nübortem meyong reju aser item atema tajung inyaktsübaji senso shia khuret lir, ta lanurtemisa metetdaktsü.
Iba ama tia ka nung, Mokokchung DC-i lanurtemi ozüng raksaogo, ta amokmerenbaji tetamatsüka aser iba ama tanurtem nem chiyongtsü tamajung agütsüba yimjak nung metetdaktsübaji ozüng raksaba mapa asü (?) ta lanurtemisa DC nem tasüngdangba ka agütsüogo.
MTLT-isa DC-ba dang pa ya Mokokchung nung nübortem asoshi tajung inyaktsü alir asü mesüra tanga tebilemba nung alir ta tasüngdangba ka metetdaktsü.
“Tangatetba tajung nung inyakba telok ka ama. Mokokchung nung aliba nübortem ajangzüktsü asoshi maneni inyaktsü aser India ozüng tapu balala agi amokmerenaka onoki lokti tejakleni aotsü asoshi inyakba mapa nung matsüngzüktsü,” ta MTLT-isa metetdaktsü.