Mokokchung Town Lanur Telongjemi Power aser PHED dept ajuru

Mokokchung, March 30 (TYO): March 28, 2016 nü Mokokchung Town Lanur Telongjem (MTLT)-i Mokokchung nung Power aser PHED Department tem ajurua Mokokchung jila nung light aser tzü supply atema senden menogo, ta MTLT, Media cell sangdong ka ajanga ashi.
Mezüngbuba nung MTLT-i jila nung power supply dak sentakba nung tongtibang onük kar power department nem metetdaktsü, aser iba sendenji tawa light oli-aruli ta maneni asüba indang metetdaktsütsü asoshi liasü.
Iba dak sentakba nung MTLT-i, sensotemi light atsükba sen teti agütsür, anungji jila nung light teti (24×7) agütsütsüla ta takhangba agütsü; iba dak alia power lemzüktsübaji bill agütsüba den liromedema asütsüla, ta shia sensotemi akhangbaji power department-i tekaraba nung inyaktsü amanger, ta parnokisa ashi.
Tanabuba nung MTLT-i Executive Engineer, PHED, Mokokchung den tongtibang tebilemtsütem lemsatepa liasü, aser iba mapang nung Executive Engineer-i jila nung sensotem nem tzü supply shitak agütsütsü atema Department-i project balala inyakba osang metetdaktsü.
Techipami len tzü pipe raksaa aliba Department-i yangludar ta shia pai, Department-i tzü tang nüngdak peritsü atema bore wells aser water tankers ama tang rongtak project agizüktsü atema  temaba bangdakpur tsüngdang  benokogo, ta metetdaktsü.
PHED, Mokokchung-i jila nung tzü tebilemtsü atema meratem agidar ta meteta MTLT-i pelar iba den külemi MTLT-i Nagaland sorkar dang item ama project tem tekaraba nung renema inyaktsü asoshi mepishir, ta sangdong nungsa shia lir.
Tatemsa, tzü supply malidangbo charge malitsüla (sen 30), ta MTLT Media cell sangdong nungsa shia lir.