Mokokchung Town nung FIFA World Cup asaya ajitsü renemshiba yimya ya tangsa anentsüla

– tiatoshilkr@yahoo.com

Ni yashi Mokokchung town-i kü nüngdak ka atema aru. Len tom nung Mokokchung town nungi aruba commercial TATA Sumo ajak nung wako (flag) balala songer süitep. Aji kechi temaitsü ta dang bilemer toktsü. Kodang ni Sewak gate tonga aru, iba nungi tenzüker town nung nija ki aika nung, aser sentep ki office nunga dena, alima balala wako songer angu. Talisa, nija kari aika nung joko wakotem tejen küma songer senzütepa angu. Item ya ngur kü driverba-i “ya kechi flag balala paika ya Mokokchung town nung asonger?” ta asüngdang. Ya FIFA world cup saitsü ajitsü terenemshiba mapa ta pa dang ni ashi. Kü driverba Eastern Nagaland nungi lir, saka pai iba inyakyim ya kanga majung ta kü dang ashi. Nia hau ta langzük.
FIFA World Cup asayaba mapang Mokokchung town nung iba ama wako songteper telok-telok tentetba ya taküm tasen masü. 2014 nunga Naga lima ajunga political khuret tulu adoker Naga kintem menden balala agi raktepdang asen Mokokchung town nung aliba Aor-tembo kin balala flags sonteper ayaterem nung telok-telok lemsar arteba world cup football ajitepdang, tangar kintembo political decisions aika agiadoker liasü. Asenok Aor kanga akoksaba mapang ka liasü. Ni iba inyakyim nung kanga jashia aser nemjema bilem.
Ano 2018 FIFA world cup Russia nung June 14 nungi asayatsü ta sangdongdang asen Mokokchung town/district nung aliba Aortembo alima balala lemsar oda ita ka tepiyong asayamong asoshi jilia renemteper. Alima balala wako alitepa songteper, joko mapa tongtipang aika sendoker mesüra thinena yur television nung football asayaba arudang atateper. Shibai metet, tang Mokokchung town nung aliba nüburtem rongnung sensaksem aser shisaliok bushiba ajakji football indang teimba jembishinü aser tongtepratep süya alitsü. Süra, yamai football saiba meranga ajitepba yagi Mokokchung town nung kechi temelenshi bener arutsür?
Television nung aonung sangwa aser anüngdang küma telok-telok lemsar football ajitepba kazütepba yagi Mokokchung town nung rongsen-ketsüng (economy) aser shishilempa (business) nung koma renloker? Tanga district-tem nunga FIFA world cup saiba Television nung kesa aruakasa, parnokibo kechiba pei mapa sendoker telok lemsaa Mokokchung town ama inyaktsü memolunger? Mokokchung town nung yamai telok-telok lemsar television nung football saiba ajiba ajanga state level nung Mokokchung town nungi adokba football team ajanga kwiben champion bener arua lir? Kohima town nung danga Mokokchung town/district nungi football team kwika arua takok ngua saiteter? Oda state level-ji toktsür, asen Mokokchung district football trophy saitepdang FIFA world cup yamai longsotepa ajitepba ajanga kechi temelenshi bener arur? Yaküm (2017) MDFT saiba mapang telok-telok/yim-yim lemsar lendi tashi nung züktepa arishitepba jenjang ajangzük asü, mesüra MDFT nungi team karbo kanga junga yanglutet?
Ni iba ocet züluba ya, FIFA world cup asayaba majitsü atema ashirba masü. Ajaki pei mapang aser mapa asadanger ajitsü yongyar. Saka tang Mokokchung town nung wako balala songer telok-telok lemsar world cup saiba ajitsü renemtepba yagi rarapangsen aser lokti telemsa dang tali züintsü, aser pei mapa aser rongsenren nung tamakok tulu bener arutsütsü. Anungji tang Mokokchung town nung FIFA world cup sendak nung sobaliba tasen tenzükya aliba ya khenyongi anentsüla. Aser world cup asayaba issue yabo pei kibok aser nija issue dang kümdakjang. Iba yagi asen Aortem tesüleni odaktsüdaki.