Mokokchung yimdak “Telungjem Terenlok” omen nung Moatsü benjong amung

Mokokchung, May 1 (TYO): Mokokchung yim Riongsanger Putu Mendeni Mokokchung yimdak Moatsü benjong tulu ka “telungjem terenlok” omen nung ajemdaker ayongzüka mungogo.
Sentong nung Moatsü ratet, Moatsü salem o den telok balalai akhi Aor tetsü tebou yimya nung sobaliba sobusolem agir kenten menü aser yar tsüngsang tapu balala aiba ajanga benjongmungertem kanga longsotepa liasü.
Tanü iba sentong nung tongti o jembir SE, PWD, Er. L.Senti Jamiri omen nung ajemdaker jembidang, “lokti ka lungjembaji kanga dang tashi tulu, telungjem den medemdangtsü tanga tashi kecha mali, telungjemi makoktsü kecha mali aser kong lokti telungjem lir yangji nüburtem sadok-sadoka nükjidong tongteta jangratema liteter”, ta ashi.
Paisa tanü Ao lima yimtsüng aika nung telungjem tashi maitdaktsüba kuli kar lemsatepdang, “yimer rongnung lipoklisang aser jazükjakpong kanga bulua jembir, political party balala tsükchir ama liteper, item otsü aser yimyatem ajanga yimer tsüngda aser adianu tsüngda temeim mekonga kümdakja tesendaktep aser telungjem raksatsür”, ta ashi.
“Tesüiba otsü aser mapatem meteta alibaji junger saka asüng lanu putu asoshi tanü aseni yimli agütsüteper tangatetba nung lungjemer tarutsü nükla tajung ayutsü nüngdaker”, ta paisa ashi. “Aritepa aliba tensa ka nung shiri tesüiba otsü aser maparen indang dang teti jembir, item nübur aser loktiji tarutsü asoshi nükla tajung makatem asütsü”, ta paisa shisem.
Er. Senti Jamirisa lungjema alitsü asoshi teinyaktsü kar lemsatepdang, “tangar nem telungjem asoshi inyakdaktsünüba shisatsü masü saka aseni anir telungjem asoshi meranga inyaktsü tangatetba alitsüla, nisung shiai tzüzüng ozüng aser bangdak kübok tashi angatsüla aser senso rongnung kati ka akhümtsübu agütsüba ajanga telungjem tashi idaktsür”, ta ashi.
Lokti lenirtemi mapa ajak nung asüngteta ochi shia inyaktsüla kechiaser masüngtetba yimya ajanga nüburtem teimla samadoker aser “kong nübur teimla maka yangji nükjidong ajak chirepa telungjem samar”, ta paisa ashi.
Lokti tentet nung nübu shisatsü aser rongsen nüngdak, anungji, “pei akaba sempet agi lokti tenzüktsüla, kati ka taoba ta yimli sayutepa, metongshitepa, tenüngsang tetushi agütsüba ajanga telungjem tali tashi ita kümdaktsür”, ta paisa shisem.
Paisa terenlok tsütsü onük kar ashidang, terenlok asoshi mezüngbuba meraji rongsenkettsüng nung nisung shiai tangar dak memetaloki pei peribo meranga inyaktetba alitsü, saka tia maka India lima nung Centre dak metaloker alir state-tem rongnung Naga nungerji tematiba jenjang (92.5%) nung lir, ta kuli kar metetdaktsü. “tangar dak metaloker alirtemi kodanga renloka pi den toktepa moutettsü”, ta paisa shisem.
Paisa renloka aotsü asoshi teinyaktsü kar lemsatepdang, “kija shiai pei kibong nüngdak peribo meranga inyaktsüla kechiyong maka mait aser azümesen ajanga aiben ochi mashi aser tamakok alur, nisung shiai pei metetba aser angazüka aliba shisatsü lemsateptsüla, lokti mapa tajung asoshibo pei akaba rongsen aser nübu mulungsoa tenlatsüla”, ta ashi.
Kaketshirji tarutsü nükla asünung, “kaketshirtemi taküm, shisatsü aser sempet ajak agi bendanga agüja alima nung shisa tajungtemji ngutettsü nükjidong ayutsüla”, ta paisa ayongzük. Ajak dak alia, “nübur rongnung temeimtep lira memeteti tashi tait telungjem tajung den terenlokjia adoktsü”, ta paisa shisem.
Iba sentong nung taoba PHED minister Dr. Ngangshi K Aoia mapang tatsüka agia bejongmungertem ayongzüka liasü. Iba sentong nung Ungma, Chuchuyimpang, Khensa yim, Longmisa Senso Telungjem Mokokchung, ENPO Mokokchung Unit, Sumi Union Mokokchung, Mokokchung town kübok ward balala nungi lenirtem, anükabang, temba-tinu aser sensosanger aika arua longsotepa munga liasü.