Moldova-i linük Tir election agiogo

Chisinau, October 31 (Agencies): Moldova linük-i par Tir election yashi, Deobar nü agiogo. Tan election agiba ya Moldova linüki 1990s mapang sülen tan mezüngsüa tetsükdaktsü aser timtem kechi majurui election sentong takok ngua agir lir.
Ano, tan election ya kanga dang tongtipang lir kechiyong tan election agiba sülen par linüki European Union (EU) mesüra Russia den tesendaktep tajung yanglutsü telemtetba agitsü.
EU nung züngsemba Romania aser Ukraine linük na tsüngda tentetba Moldova linük par tentet nung züngsemdaktsütsü nükjidong nung EU, US aser Russia nungeri Moldova lenirtem ajungshia aruba osanga bushiteta lir.
Tan election nung candidate ama toktepa shilem agir candidate 9 rong nung Socialist yimtenren telok lenisang, arishi küm 41 tain Igor Dodon jenjang tajung aliba osang angazükogo.
Par linük senpong nungi dollar sen billion 1 shi 2014 küm samaba sülen Moldova-i yimtenren mepetmesü kanga sashia ajuruba den, International Monetary Fund (IMF) aser EU nati par linük nem sen aputsütsü mapatong anenadok.
Sen samaba ken o nung aitsüba sülen taoba Moldova Ato Kilonser, Vlad Filat parliament nung apu aser tesülen tepuokdak puoka ayu.
Iba mapang nungi tenzüka, Moldova yimsüsür aser lenir ajungai par rongsen akaba osang yimjak nung metetdaktsütsü ozüng Moldova parliament-i lateta lir.