Molulem kümzüka ayutsüla : Mokokchung DC

Mokokchung, October 31 (TYO): Tanü sangdong ka ajanga Mokokchung Deputy Commissioner, Sushil Kumar Patel IAS-i Village Council tem aser GB temi district ketdangsertem agent ka ama Nagaland nung molulem mapang tatsüka amungba mapang iba ozü kümzüka ayutsü atema pei yimtsüng nung nüburtem nem metetdaktsütsü aser temzüng alema inyakertem merenshitsü tetuyuba agütsü.
Küm shia September ita tom nung Amur Falcon ta ajaba ozü Nagaland-i arua amunger aser November ita nung toktsür aor. Item ozü ya parnok linüktemi kanga anepalur, tag asür, azünger aser acha ayanger.
Amur Falcon ozü ya Wild Life Protection Act 1972 kübok kümzüka ayur anungji iba ozü apuba, tepsetba aser ayokbaji temzüng alema lir aser aibelenertem iba Act nung arrla  51 kübok küm asem tepuokdak ayutsü mesüra senchi sen 25,000 tashi achitsü mesüra temerenshi anaprong agütsütsü akok.
Iba dak sentakba nung Chief conservator of forest Nagaland, Kohima-i, Nagaland nung iba ozü mapang tatsüka amungdang state sorkari iba ozü kümzüka ayutsüji temzüng nung aliba teinyaktsü ka lir, ta sangdongogo.
Sate sorkari tuyuba nung- Village Council tem aser GB temi district ketdangser agent ka ama iba ozü kümzüka ayutsü atema pei yimtsüng nung nüburtem nem osang metetdaktsütsü aser temzüng alema aibelenertem nem tuyua aliba ama temerenshi agütsütsü shia lir.
Iba dak alia Mokokchung district nunga iba maparen takok angutsü atema administrative ketdangsertem aser police-ia mapang shia mita senzütsüla, ta Mokokchung DC-isa metetdaktsüogo.