Molungtetba nung takokba lir (A triumph of spirit):

Translated for awareness and inspiration by
Mrs. MEYISONGLA
Rtd. Deputy Director Nursing,
Nagaland : Kohima.

Myo-Buni Korea tsür, Yong-Jung Chung- truck driver ka kinüngtsü, tanur kanga tulu ka bena alidang ajungbena azü ayim tenzük. Kyong province ya Seoul nongi kanga talangka pilaa orr aliba yimtsüng ka nung terepranger tajung malidak la tanur amongtsü mapang atong. Saka tanur kanga tulu aser ibai mezüng tanur aso. Saka tasodang lenmang nung kanga kangshia mapang talangka aliba agi tanurji tango mesashiteter, majiper aser ola tilakata madoktet. Tanurji nakremnakrema aküm (blueish colour), oxygen mopung agi meperiba agi. Teyarisangi kanga meranga anepalur tanurji marakzü nung, pai sü temesung tila ka agi tanurji aleper sadem nung judaka doktsü. Aser tetsü dang yamai ashi, nür tanur asüba agi ni jashir (I am sorry, your child is dead).
Myo-Buni nünga jeba yamaji kü dang teshi ta sür apuapua orr sadem nungi lai asoba tanurji atsüzüker blanket talem kati jungjunga aleper la anasa ayu. Gonda anashi lir la amui aoba nungi saker tanurji reprangdang nung tanurji tera meremmerema kümer angu. Lai tanur tejemi nung meyimdang, tanurji tera arakzü aser tanurji tanemi aketa ajeptsü tenzük, aser tanemi shia aru.
Aji sür külen pai tanur “Hun-Ki” tambur ka dangi anir ao, pai tanur kolak nung amdanger yamai ashi, na shisa tebulu, nür tanur ya tekolok techira ka asütsü aser tesülenbo tulur nisung ka akümtsü ta ashi. Nai pa nem eduction agujang ta ashi.
Saka pa jabaso Hunki tetezü sayatenya nung kumzükba tanur ‘Miracle child’ ita 4 jungaka, tekong mesongteter, kum ka jungaka menokdakteter, kum ana nung ola madokteter . Tetsüi par japaso Hunki doctor aika dangi anir oa sayu. Doctor kari la dang na kecha shisa tebulu, tanur karbo meilongi dang jajar aser o ashir ta ashi. La molungjang tera sünepa aküm. Doctor aikati Hun-ki tashidak jungabo meputet.
1978 kum Doctor kati Myo-buni dang la tanur koma aso item ajak otsüji asüngdanga zülu. Tesüsa doctor-i lar tanur “Cerebral palsy” ta putet. Tanur tekolok lenmang nung mapang talangka mejepdaka ayudang tekolok zü kar raksaa lir ta ashi. Tekolok nung mopung tajung peria magutsutetba agi, ibai meyanglushitettsü. Pai kanga jungabo marakzutettsü aser mejajatettsü ta ashi. Lai iba tebilemtsü khuretji junga angatet aser tajunglen nungi agizük. Lai ashi, kecha masü, ni akok tashi ozü jabaso anepalutsü.
“I will help my son, I will face this problem”
Kodang Hun-ki küm 6 ajung, lai tetsür chanu ka kanga junga aso. Hun-ki tenu kanga meim, tena anogo piyong asayaa kazü, tetsü kanga pelaa liasü.
Korea nung sopettangpeter school nung seat magütsür aser asepana mapa dang inyakdaktsü. Tamalen tambusangi ashiba o to lai teti bilemer. Nür jabaso education tajung agüjang ta ashiba o to agi la molungjang nung teti jembir.
Lai matamebensar ayuba tesem aika sema senzü, Saka yangji karbo chair nung alenloka(chained) ayur, kar atem nung dang longdaka yutsüba lai angu. Lai kü japaso bo yamai medoktsutsü ta bilemer, lai pa IQ test südaktsü. Pa ya kanga tekolok tait (intelligent and above average) ta la dang ashi. Lai par yimdak Primary School Principal dang par jabaso School admission atema seat asüngdang. Head masteri pai tangar tanur meyirutsülima? Masü parnok anasatepa memendaktsütsü. Süra asüng pa admission agitsü ta ashi. Par kidang nungi schoolji 30 kilometer talang liasü. Tetsüi anepdang yakda saka chiyongdaktsür merak mejur. La rongku nong süloka ponger, schooli ao. Pur medemeri menüjaka aji kecha sükshia mali, lai front seat aser window pang anasa table tuluka yutsür pa mesüng mendaktsü. Lai window anasa kimalen nokdaker lar japaso nüngdak ajak aguja yari. Küm asem tashi iba timtem arema lai inyak. school senshidang lai japasoji ponger kidangi ao. Küm paikati tetsüi pa ponger oli aruli ta asüdang, kenü dang pai tetsüdang jashia ashi, oja nai kü tetsüng tashi itta yanglu asübo ni ozü medemertem den asemteptsü, parnoki ni kodanga memeneptsü aser football asayatsü parnoki ni kodanga mekoklah ta kanga sasaseta ashi.
Myo-buni lar japaso dang ashi, nai itemji odang dokjang saka nü lesson nung dang temolung kanga agüjang, süra shingaia na memeneptsü. Hun-ki marks ajak dang tajungtiba angudang tesayur aser medemer ajaki süngmang. Kenüpbo school tanur aika senteper tsüngtsükba ta shia kanga menütsü aser karibo long agi pa dak aon. Parnok dang nai tai tokang, kenübo parnoki akseta bilemtsü, ta tetsüi ashi. “One day you will be the real winner”
Pa kodang class pezü nung liasü, tetsüi nai jajatsü merangdang ang ta ashi. Pai alokaloka jajatsü merang. Kenü tesayur Hyuni Hun-ki pa officei jar na college azüngtsü tebilemba koma ta asüngdang. Idangji pa temeyong tekürak ka jagi computer keyboard-ji sayu. Aji kanga junger saka na temeyong arakzütsü mesadem, anungji Seoul National University nung seat bushi tajungba asutsü ta lenmang sayu. Myo-buni par japaso atema Seoul National University principal den par jabaso admission atema jembitep. Nür jabasoi mapaji inyaktettsü süra, bilemdangtsü ta ashi. January 6, 1993 nü anir oa admission agitsü test agi saka mark agi tera matong. Iba mapang shidak nung tesayur Hyuni par jabaso Hun-ki pa office aja (SNU’S) . Par SNU nung admission agütsütsü test paper den table tulu ka nung mener examji agutsü. Hapta asem lir phone call ka ajanga Hun-ki ‘Congratulations’ the frist person with cerebral palsy kati yamaji junga university ka nung pass asübaji atema Press nongi Reporter aika sentepa noksa agia osang Seoul sünga prokshi. Newspaper headline sünga Hun-ki ajungba indang zulur angu. Pa honour nung pass asü aser tesayur post agütsü. Tarutsü nung ni ama disabled person kü class nung adentsü arutsü ta pai bilem. Iba atema Seoul’s Sejong Cultural Centre nung May 1994 special benjong tuluka liasü. Iba benjong nung Seoul President Kim Young Sam, Hun-ki nem tetushi tulu(Congratulations) agütsü. Iba sülen Prime Minister Lee Yong-Duck menürema nokdaker Myo-buni nem akümtsübu agüja salemer Hun-ki nem certificate agütsü. Telok tului ayimten – “Parent of the Year” ta ashi. Hun-ki mathematics tutors aküm. Pa sülen tangar Cerebral Palsy tanur ka iba school nung azüngtsü seat agütsü, 1995 kum Myo-buni Tsüngrem angateta, maksü aser iemtem tulu arema, lai asoba mata mabensa tanur ka nüngtugu Mathematics tutor kümdakja Seoul National University ka nung mapa inyakdaktsü.
Tayongzukba: Aotsür-tem na mata mabensa tetsü ka asü ? Nai mata mabensa asoba tanur kinük nung miimshia ayur asü ? Myo-buni ama ochishia Khuretji abener ?
“Do your best, She told her disabled Son and you will be the winner” – Myo-Buni

Source: Reader’s Digest, May 1996(p-146).