Mon Basti Village Council-i jangjashitsür

Dimapur, April 17 (TYO): April 16, 2017 nü Tir Yimyim osangkaket nung “32 Assam Rifles sepaitemi tapoktsu osettem aika apu” ta osang adokba dak sendakba nung Mon Bosti Council-i, 32 Assam Rifles-i tetsür ka tenüng agi, Marsenla’er kidang Gelatin sticks, detonators aser Safety fuse apu, aser laji Mon Bosti nung alir ta ashiba osangji tai ta jangjashitsür, ta tanü Mon Basti Village Council Secretary, Alem Aonok aser Mon Basti Council Chairman, I. Tongzük Lemtur nati külem sangdong ka ajanga metetdaktsü.
“Osangkaket nung adokba ama masü, saka Marsenla ji Choto Lingri nung alir. Iba den külemi tarutsü nung kija mesüra telok kari danga amajok nung tajemdakdak kecha makai ozü yim tenüng menüktsüra Mon Bosti Village Council temzüng nung lateta aliba ama temerenshi tulu agütsütsü,” ta sangdong nungsa shia lir.
Iba dak alia Mon Basti Village Council-isa, kija, lokti mesüra lokti tentet shinga mulungjang meyirutsütsü atema tarutsü nungbo osangtsüsang belenertemi aser ozüng amertemi kanga kümdanga inyaktsü mepishia metetdaktsür, ta kasa sangdong nung shia lir.