Mon DC ajanga tetuyuba talila metetdaktsür

Mon, Chiteni/July 02, 2021 (TYO): Home Department, Nagaland State Disaster Management Authority ajanga June 30, 2021 nü agütsüba tetuyubatem aser June 18, 2021 nü agütsüba Office Order nung maneni anidaka, June 30, 2021 nü DC Mon, Thavaseelan K, IAS-i sangdong ka ajanga, Mon District nung July 10, 2021 tashi lockdown temzüng den teküboklen maparen kar lapoktsü aser tetuyuba talila nung anidaktsü, ta metetdaktsür.
1. Nüngdakba osettsüset ayokba dokantem aser shishilembaba tesemtem anepdang 6:00 ako nungi nikongdang 2:00 ako tashi lapoktsü melar.
2. Dokan shia nung amener/inyaker ajak vaccine agiba indang osang tejangja sayutsüla. Kasa mapang, Block Task Forces/Ward Task Forces/Village Task Forces temi dokantem mita aotsü aser reprangshimtsü. Iba ya nüngdakba maparen ka lir.
3. Kou mejepba dokan aser saloon nung inyakertem vaccine agir sülen ang lapoktsü melatsü. Iba dak sendakba nung dokan (barber aser saloon) kiburtemi tim Administrator, Town Council mesüra Area Administrative Officer dang application agütsütsü akok, aser kuli tejangja ngur sülen ang maparen awawa inyaktsü asoshi melatsü.
4. District nung Sorkar Office ajak staff shilem 50% dena mashi anogo nung lapoktsü akok aser office mapang COVID-19 dak sendakba mera ajak nung anidaktsüla. Sorkar tenzükba wadang nung inyakertem, shirnok Office-i marur, parnok pei pei kidang nungi inyaktsü aser rongdak office maparen atema phone/mail ajanga tongteprateptsü.
5. Aonung 7:00 nungi anepdang 4:00 tashi nisung/gari senzüsenbongba nokdangtsü.
6. Public transportation aser non-essential services atema district balala tsüngda senzüsenbongba maneni nokdangtsü.
7. Kiyimba, asüpila aser sports training nung nisung 50 tashi adenshitsü melar aser mapang shia COVID- 19 inyakyim benshiba den SOPs sülen anidaktsü.
8. Tamangba yimsü dak sendakba tesemtem/tenla ki nung nisung 50 tashi adenshitsü melar aser COVID-19 inyakyim benshiba den SOPs sülen anidaktsü.
9. Taoba mapang Office Order ajanga sangdongba ama, district nung garitem ODD-EVEN yimya nung maneni jajatsü.