Mon DC-i anentsüh aluba tesemtem semdangogo

Mon, September 03 (TYO): September 2, 2015 nü Mon Deputy Commissioner, W. Honje Konyak-i anir district nung ketdangsertem den ADC aser EAC nungeri Tanlao Ward Mon nung anentsüh aluba tesem semdanga lendong agi amshir aliba kibongtem, ward council mendenpur aser züngsemtem den sensaksema liasü.
Iba anentsüh yagi ki ana magitettsüsa raksatsü, ki pezü tesadang ka shi anenzüka bener ao aser iba tesem rangben telungleni anenoka aiba osang kanga junga asadangba sülen jangjaogo.
Nübur jenoktsü atema tesem tasen agütsüji mapa tasak ta ashiba mapang, W. Honje Konyak-i, iba ama tejenokdak tesemji Mon nung dang masü saka Nagaland rangben nung agütsütsüji tasak kechiba süra ali ajak nüburtem meyong lir koba terenlok mapa balala inyaktsü asoshi lir anungji iba ama tesem yanglutsü asoshi sorkari ali yimtsüng shia dang ali alitsüsa akümtsü, ta ashi.
Lendong agi amshia alirtem yaritsü asoshi pa dang temaba pur dang ashitsü aser iba tesem nung ki asütsü sentong alirtem dang lung ki masüba tajungba asütsü, ta Mon DC-isa ashi.
Kedangsertem tenüng nung pai, anentsüh agi amshir alirtem nem parnok takoksa ajuruba asadangba sülen tang rongdak nüngdak asoshi teyari sen10,000, 5000 aser 2000 lema agütsü. Iba den külemi pa nija tsütsü nungi terara agütsü.
Tanlao ward ya 2012 küm nungi telungleni anenoka aier aser ibaji ajanga joko küm ana-asem tashi yangji aliba nüburtem kanga timtemteper.
Tanlao ward nung ward Council mendenpurtem, züngsemtem aser nüburtemi District ketdangsertemi aria bilemja ward semdangba aser lendong agi amshirtem nem tang rongdak nüngdak atema sen agütsüba asoshi kanga pelaba metetdaktsüogo.