Mon DPDB-i Imnasangba asüba mangyimer

Mon, June 17 (TYO): June 15, 2019 nü DC Conference Hall, Mon nung DPDB senden amendang Chairman DPDB, Mon & Advisor aser Advisor Fire & Emergency Services, SIRD, and Relief & Rehabilitation, Pohwang Konyak-i SDO (PHED) Mon, Imnasangba ajungbena asüba atema mangyim lemsatepogo, ta ketdangsertem osang ka ajanga metetdaktsü.
Asür Imnasangba ya Mon DPDB züngsem ka liasü.
ADC Mon Hq, Hiazu Meru-i, asür Imnasangba ya DPDB züngsemtem rongnung mapa nung tenendak, ochishir aser külem tenzükertem den jungtepa aliba ketdangser ka liasü, ta metetdaktsü.
1985 küm Fenruary ita nung Mon nung pa SO ka ama Mon-i aru aser küm 23 tsüngda Mon district nung aliba Sub-Divisions ajak nung inyakogo; 2009 nungi 2011 tashi küm asem ang pa Dimapur nung posting liasü aser 2011 küm promotion ngua maneni Mon-i meyipa arua SDO inyaka liasü.
“Pa anojungi June 14, 2019 nü asüba ajanga Mon District aser DPDB Mon kanga tongtibang züngsem ka makai kümogo. Board-i mangyimer kibong den mangyim lemsateper aser asür tanela tesünep nung anisüngzüktsü sarasademtsür,” ta Board-i lemsatep.
Asür nem akhüm agüja DPDB board züngsemtemi minute ka mokrema sarasademba sülen senden tenzük.