Mon DPDB senden menogo

Dimapur, April 18 (TYO) : Mon District Planning & Development Board (DPDB) senden, Mon Deputy Commissioner, W. Honje Konyak menden sür April 17, 2017 nü DC indang conference hall nung menogo.
Senden tenzüka Deputy Commissioner, W. Honje Konyak-i senden nung adeni arurtem pela agizük aser iba sülen DPDB züngsemtem pei sasa metetpelaba mapang agi. Iba sülen taoba mapang senden nung lemteta ayuba aser jembibatem khen azüng.
W. Honje Konyak-i tarurtem pela agüzükba mapang Aoleang benjong mapang District-i Nalaland Chief Minister arudang züngsemtemi amalitepa yaritepba asoshi pelaba metetdaktsü.
Mon SDO Civil, Ilika Zhimomi-i züngsemtem dang District nungi sorkar mapa nung tasen shimokertem asoshi ATI Kohima nung 2buba Induction Training Programme agitsü indang rasaa ashi.
Lai, April 18, 2017 nü nungi tenzüka anogo 10 nü agitsü aliba training sentong asoshi department balala nungi sorkar mapa inyaker 35-i tenüng agütsüogo, ta ashi.
Senden nung Chingkhao Compound School dang Chingkhao Lampong School ta ajatsü asoshi board-i telmelaba agütsü aser Food & Civil Supplies department dang taruba senden nung parnoki inyaktetba arua sayutsü tetuyuba agütsü.