Mon kübok Yuching yimdak ita piyong Detox camp kadar

Mon, Chiteni/July 30 (TYO): Mon district kübok Yuching yimdak ita ka piyong detoxification camp Chiteni/July 28, 2018 nü tenzükogo, ta ketdangsertem osang ka ajanga metetdaktsü.
Detoxification Camp tenzükba sentong nung jembidang De-addiction & Rehab Centre Mon Director, N. Neangba Konyak-i iba camp nung adenertem dang ajemalua alitsü aser camp tembangba sülen joko temesepba chiyungtsütem machitsü ayongzük.
Paisa Arogotem aser Mission Board dang chia-jemertem atema tongtibang shilem ka agitsüla, kechiyong joko tensa agi aji sayur, iba denji külemi home mission tenzüktsü mepishia metetdaktsü.
Iba camp tenzükba sentong nung Dr. Pangmoi, Amenla (Nurse), Chiyem, VCC Yuching aser Yuching Students’ Union (YSU) Speaker, Nahwang nungera densema liasü.
Iba sentong nung Youth Secretary KBBB, Wangchah-i meshiteta sarasademtsü.
Detoxification camp ya Yuching Students’ Union, Gospel Outreach Ministry aser KBBB nunger senteper ayongzük aser Yuching Students’ Union o Village Council Yuching nati sponsor asür.
Ita ka piyong Detoxification camp nung adentsü atema nisung 49-i tenüng agüja tendar, ajisüaka maneni ano nisung aikati tenüng zülouka adentsü imlar.
Iba camp ya Chiteni 28 nü tenzük aser Luroi/August 28, 2018 nü tembangtsü.