Mon nung anentsüh ajanga takok angurtem atema kenten sentong ayongzük

June 17, 2016 nü council hall, Mon nung Mission ‘I Love My Mon Town’ (ILMMT)-i ayongzükba kenten sentong nung Nagaland Singing Ambassadors-i shilem agiba angur.

Dimapur, June 20 (TYO) : Nagaland Singing Ambassadors-i June 17, 2016 nü council hall Mon nung kenten sentong ka nung shilem tajung agiogo.
Iba kenten sentong ya Mon nung anentsüh lendong nung takoksa ajururtem asoshi Mission ‘I Love My Mon Town’ (ILMMT) ajanga ayongzükba liasü.
Mon jila nung anentsüh ajanga talidak makartem yaritsü nükjidong nung Mission ILMMT-i iba kenten sentong ayongzüka agi.
Nagaland Singing Ambassadors nung züngsemtemji Akhro Koza, Anna Awomi, Asen Lentur, Asong Tsudir, Chanshim Makung, Emmanuel De La Rosa, Emmi Odyuo, Inahoka Yepthomi, Jonathan Yhome, Judy Honor, Khriezenuo Suokhrie, Kusato Keyho, Manpai Jorlym, Marhomo Kithan, Norman Villas, Susa Sami, Takosunep Jamir, Tiakumzuk Imchen, Tsotso Mekrisuh, Vini Assumi, Watiya Jemu, Welly Baruah aser Yeshika Assumi nunger lir.
Iba lendong ajanga Mon kübok Tanlao ward aser Techhan ward nung teraksa jenti bener arutsü aser ali anenoka aiba ajanga Edith Douglas School building kanga mejungi raksa.
2015 küm Tanlao ward nung kibong 83 tashi takoksa ajuru aser kibong aika pei talidak toktsür aotsüsa aküm. Delhi nungia central team kati 2015 küm iba ward semdanga liasü.
Taküm Mon town kübok Techahan ward nunga anentsüh ajanga kibong 83 tashi talidak maka kümdaktsü aser kibong 150 shi timtem ajuru.
Ali anenoka aiba ajanga sorkar school ki ka raksa aser Nagaland State Disaster Management Authority den District level Disaster Management Authority-i relief camp ka lapoka takoksa ajurur nem teyari agüja liasü.