Mon nung Badminton championship tenzükogo

Dimapur, July 16 (TYO): Yashi, Hokolbar nü nungi tenzüka Mon District Open Badminton Championship cum Selection agitsü tenzükogo.
“Mon District Badminton Association (MBDA)-i Mon District nung alir lanurtem ajungmesotsü nükjidong nung tan asayamong takok ngua ayongba atema kanga pelar,” ta yashi asayamong tenzükba sentong nung tongti tesemdanger, Advisor DUDA, N. Thongwang-i pelaba olen ka lemsatep.
“Takok angur ka akümtsü atema tatsüba lenmang kecha mali saka temulungtetba tulu yur bendanga agütsüba ajanga dang takoker kaka kümtetter. Bendanga agüja shilem agitsü temulungtetba aliba ajanga dang Mon District nung alirtemi saisapongtsü sabang nung takoker kaka kümtettsü,” ta pai tayongzükba olen ka sangoktsü.
Tan asayamong tetoktepba tenzükba jakdang tongti tesemdanger, Thongwang; DC Mon, W. Honje Konyak aser Rev. Methjin, Pastor Sangtam Baptist Church, Mon nunger dsensema, VIPs aser MDBA züngsemtem rong nung exhibition asaya asaya liasü.