Mon nung DUDA-i angati medical camp ayongzüka agi

Dimapur, July 16 (TYO) : Mon jila kübok yimtsüng ti nung yimdaklirtem aika adenshia angati medical camp ka nung teyari agiogo.
Iba camp ya Department of Under Developed Areas (DUDA) ajanga ayongzük aser DIET centre, C Goching village nung agi.
Iba medical camp nung shiranger 606 tashi anepalu aser mozütem angati agütsü. Temang anepalurtem rongnung tetsür 402 aser tebur 204 liasü. Iba den külemi tenarong majunger 14 nem hearing aids agütsü.
DUDA Advisor, N Thongwang Konyak-i medical camp lapoktsüdang, “mapang shitak nung iba sentong ayongzüka agir kechiyong June nungi August mapang tzünglu aruba aser mongpu melenshiba ajanga nisungtem shirangteper,” ta ashi.
“Iba mapang ya yimdaklirtem temang anepalutsü mesüra mozü alitsü atema timtemer. DUDA ketdangsertemi mapang shitak nung angati medical camp ayongzükba atema tenüngsang agütsür,” ta Thongwang-isa shisem.
Iba sentong nung Commissioner & secretary, L Kire, IFS-i anir DUDA ketdangsertem- Director KS Anden Konyak, joint director, Dr. Anungla Imdong Phom nungertemi maparen ketdangsüa reprang. Parnok den Joint secretary, Municipal Affairs & Nagaland Civil Service Association (NCSA) president, Kevin Zehol dena liasü.
DUDA medical camp nung doctor temji – Dr. Watsutho Nyuthe (senior specialist, NHAK), Dr. Zimatho Nyusou, (ENT specialist NHAK), Dr. S Manyau Phom (SMO, CHC Medziphema), Dr. Aman Konyak (gynaecologist, Civil Hospital Mon), Dr. Chimang Paul Konyak (paediatrician, Civil Hospital Mon), Dr. Wungyong Konyak (MD general medicine, Civil Hospital Mon) aser CMO, Civil Hospital Mon, Dr. UK Konyak nungertem liasü.
Sentong nung C Goching village council chairman-i tesentepertem pela agizükdang DUDA department-i par yimtsüng nung medical camp ayongzükba atema pelaba metetdaktsü. Sentong nung mendenji Director, DUDA, KS Anden Konyak liasü.