Mon nung Food Processing training agir

Dimapur, Aenjeti/Jan. 29 (TYO): Small Industries Development Bank of India (SIDBI) ajanga sponsor süa Can Youth aser KNSK den lungjemer District Administration, Mon ajanga Council Hall, Mon jila nung Food Processing training ka January 28, 2020 nü tenzükogo.
Iba sentong lapokba mapang SDO (C) Mon, Illika Zhimomi-i ashiba agi, tetsür tanurtem aser tetsürtem atema entrepreneurial skills aser pei sasa aayanga chiyonga-jema taküm litettsü asoshi ajungmesoa maongka agütsütsü nükjidong nung iba training ya agütsür. Tetsürtem asoshoi skill development aser sen arutsüba sentongtem district nung kanga nüngdaker, aser chiyongtsü tabu balala yangluba training ajanga kidang aser loktiliba nung senotsü bushitettsü. Laisa training agirtem dang training kanga junga agia aser course tembangtsü asoshi meranga inyaktsü ajunshi.
Kasa sentong nung Chief Functionary, Can Youth, Jenpu Rongmei aser Advisor to KNSK Lamlin Konyak natia mapang tatsütsü agia jembi. Iba training nung Krishna Gogoi, Marina Rongmei aser Marnungla Tzudir nunger ya shisalen sayurtem alitsü. February 28, 2020 tashi (ita ka) agitsü aliba training nung nisung 38 tenüng züluoka lir, ta ketdangser sangdong ka ajanga ashi.