Mon nung Inter School otsüno züluba tetoktepba agi

Mon DC, Thavaseelan K, IAS-i Inter School Essay writing competition nung takok angurtem nem sempet lema agutsüdang tangokba noksa nung angur. Mon, March 6, 2019. 

Mon, Metsüremi/March 06 (TYO): Beti Bachao Beti Padhao campaign dak sendakba nung tanü Mon DC Conference Hall nung Mon District Administration-i ayongzüka Inter School otsüno (essay) züluba tetoktepba sentong agiogo, ta ketdangsertem osang ka ajanga metetdaktsü.
Sempet agutsüba mapang nung Mon Deputy Commissioner, Thavaseelan K, IAS-i, ‘jalatem kümzüktsü aser la nem shisaliok agutsütsü atema nüburtem tangatetba tama melenshitsü nüngdak’ ta ashi.
Temelenshi adoka tetsür chanu ka jenjang ajungkettsütsü atema asenoki awareness campaign tenzükogo, ta paisa ashi.
Inter School Essay Competition nung mezüngbuba jenjang nung takok angurji Sacred Heart School Mon nungi Apo Y Konyak liasü. St. Joseph School, Mon nungi Alih P Konyak-i tanabuba jenjang aser Eastern School Mon nungi Mary A Konyak-i tasembuba jenjang nung takok angu.
Takok angurtem nem certificates agutsü aser shilem agir ajak nem sempet agutsü.
Iba tetoktepba nung Mon district nungi school 15-i shilem agia liasü.
Iba sentong ya Beti Bachao Beti Padhao (BBBP) kübok Mon District Administration-i ayongzükba liasü.