Mon nung ita ka detoxification camp agi

Dimapur, Luroi/August 29 (TYO): Mon district kübok Yuching yimtsüng nung ita ka detoxification sentong agir Luroi/August 28, 2018 nung tembangogo.
Iba anogo ya Yuching yimtaklirtem asoshi tongtibang anogo ka lir, kechiaser iba camp ajanga opium, ganja aser temesepba chiyongtsü achirtem kanga ajangzükogo, ta Mission Secretary KBBB, Toantao-i ashi.
Iba camp takok ngua agitetba asoshi pai village council, Arogopur aser kaketshirtem nem tenüngsang agütsü.
YSU tir Ponwang-ia iba sentong tembanga jembiba mapang KBBB, arogotem, village council aser telok balalai teyari agütsüba asoshi pelaba lemsatep. Paisa kija aser lokti balalai, rongsen, nübu, shisatsü aser sarasadem agi yariba asoshia pelaba shisem.
Kasa sentong nung Nyamto Angh aser GS Gospel Outreach Ministry, Mon nungi Athom natia o jembia liasü aser client tem atema Touring Evangelist, Rev, Tapha-i sarasademtsü.
Chiteni/July 28 nungi tenzüka Luroi/August 28 tashi agiba detoxification camp nung nisung 50 dak tali arua shilem agia liasü.
Iba sentong ya Yuching Students Union, Gospel Outreach Ministry aser KBBB longjemer ayongzük aser Yuching Students Union aser Village Council Yuching ajanga sponsor asü.