Mon nung matamabensartem atema Medical Camp kadar

Dimapur, June 08 (TYO): June 08, 2017 nü Civil Hospital, Mon nung People with Disability (PWD) atema awareness den Medical Camp ka tenzükogo.
Iba sentong nung jembidang Mon Deputy Commissioner, W.Honje Konyak-i, district nung matamabensartem atema ano taliba raloka inyaktsüla, parnok tsüraburtem nem dang iba khuret nungloka meyutsüi ajaki amalitepa nendaka inyaktsüla, ta ayongzük.
Honje-isa, iba ama awareness aser medical camp ayonga akaba ajanga district nung matamabensar aika yaritettsü, aser iba ama sentong ya tarutsü anogotem nunga ayongzüka akatsüla, ta metetdaktsü.
Iba sentong nungsa Commissioner for Disability, Nagaland, Dr. Atha Vizol, Nagaland Parents Association for Disable (NAPAD) General Secretary, Kapochu-o Naleo, NAPAD Asst. Treasurer, Bendanginla Imsong, State Nodal Agency NAPAD Coordinator, Tongpang L. Jamir, CMO Mon, Dr. U.K. Konyak, MS Mon, Dr. Kechongol Sopie, tsüraburtem aser matamabensartem dena liasü.
Iba sentong ya partner department; Commissioner for disability, Social welfare, Health & Family Welfare aser District Administration, Mon-i ayongzük.
Medical camp ya June 8 nungi June 10, 2017 nü tashi akatsü.