Mon nung medical college yanglutsü atema lung azüngtsüogo

February 26, 2021 nü Mon Medical College indang lung azüngtsüdang Union Health & Family Welfare Minister Dr. Harsh Vardhan, Nagaland Chief Minister Neiphu Rio aser tangartem agiba noksa angur. (Mon, February 26)

Kohima, February 26 (TYO): Hokolbarnü Union Health & Family Welfare Minister Dr Harsh Vardhan-i District Hospital, Mon nung Nagaland indang medical college tanabuba yanglutsü lung azüngtsüogo.
“Prime Minister Narendra Modi lenisüba kübok taruba küm ishika tsüngda Northeast nung mapa tajung aika inyaktsü” ta tanü Dr Vardhan-i ashi.
“Prime Minister Modi-i Northeast nunger atema kanga bilemer aser senden amenba shia North East region renlokdaktsütsü indang onüktem benoka jembir. Tanü iba lung azüngba ajanga Centre-i linük nung tangar memenepi alirtem atema bilemtsüba kuli sayur” ta paisa metetdaktsü.
Linük nung medical college 562 lir aser iba nungi government sector nung 286 aser private sector nung 276 lir, ta paisa ashi.
“Maneni, medical colleges 175 teyangludak lir. Linük nung medical commissions aika tentetogo health & wellness centres 1,50,000 shi ka lapoktsü” ta Union Minister-isa metetdaktsü.
Linük nung healthcare workers-i COVID-19 anema mapa tajung inyakba atema tenüngsang agütsür. Iba wara anema raraba nung India ya developed countries aika dang nungi tajungba lir, ta paisa shisem.
Dr Vardhan-isa Centre-i tenzükba Ayushman Bharat programme aser 2025 tashi nung India nung Tuberculosis samatsütsü atema mapa inyakba osang lemsatep.
“Küm 5 nungi 6 tsüngda Centre-i MBBS menden 50,000 nungi 80,000 kümtsüogo aser Post Graduate menden 20,000 talila ajungketogo. Health and Wellness Centres (HWC) 1,50,000 shi yangluba nung Nagaland nunga HCWs 370 yangludar” ta paisa metetdaktsü.
Paisa state sorkar aser nübortem dang Ayushman Bharat kübok sensaker ajak tenüng züluoktsü ayongzük. Centre-i Nagaland aser North East nunger dang nangzükba ya tebang agi dang masü saka chichiba aser aria bilema nangzüker ta ashi.
Iba sentong nung Chief Minister Neiphiu Rio-i “Iba medical college yagi Mon aser Nagaland nung alirtem dang masü saka Assam o Arunachal Pradesh state tem den Myanmar nung alirtem dena ajangzüktsü. Iba college ya Public Private Partnership mode kübok state sorkari ketdangsüa reprangtsü” ta ashi.
Paisa Prime Minister Narendra Modi aser Union Minister Dr. Harsh Vardhan dang pelaba metetdaktsü.
“Kiphire nem “Aspirational District” jaloktsüdang Mon atema langka ka inyaktsü bilem. Prime Minister-i linük nung medical college 75 yanglutsü tebilemba metetdaktsüdang iba maongkaji angu” ta CM Rio-i ashi.
Linük nung development aser health facilities maliba district balala nung college 75 yangluba nung Mon Medical College ya ka lir, ta paisa shisem.
Iba medical college ya Centrally Sponsored Scheme nung Phase-III kübok Rs 325 crore endoka yanglutsü molunga agizük. Iba ya “Establishment of new medical colleges attached with existing district/referral hospitals” scheme lir aser Nagaland nung medical college tanabuba lir.
Iba mapatong nung Centre-i Rs 292.50 crore agütsütsü aser 2023-24 nung renemtsü sentong lir. Nagaland nung backward aser state yimtiba nungi talangka pilar aliba Mon district nung medical college ajanga nisung lakh 2.5 shi ka nem healthcare facilities agütsütsü.
Health & Family Welfare Minister, S Pangnyu Phom-ia o jembidang Centre-i Nagaland nung medical college 2 tashi lapoktsüsa maongka kodanga majurudang ta ashi.
“Medical college lapoktsüba ya nübo talila akümtsüba dang masü saka healthcare maparen tajungba kümdaktsütsü atema lir. Nagaland State angudang health care facility kanga mejungi liasü saka kümtem süia arudang tajungba kümogo saka ano teinyaktsü aika lir” ta Minister Pangnyu-isa ashi.
“Nija mozü ki timba Kohima aser Dimapur nung dang lir aser tanünga district nung alirtemi public healthcare nung dang metaloka lir. Ajisüaka, sorkar mozü kitem nung facility aser osettsüset peria maliba agi nübortem timtemer. Mon Medical College renemba sülen iba temeket nung alirtemi kanga ajangzüktsü” ta paisa metetdaktsü.
Principal Secretary Health & Family Welfare Amardeep S Bhatia, IAS-i iba mapatong indang osang tatsüka lemsatepdang “iba mapatong ya Rs. 325 crores endoka yanglutsü aser ali acre 30 tashi alizükogo” ta ashi.
Tanü Dr. Harsh Vardhan-i Mon Helipad tonga arudang pa nem Rashtriya Salute agütsü aser Helipad nungi District Hospital Mon tashi aodang yimtsüng balala nungi sobaliba yartsüngsangertem aser teloktemi pa pelaa agizük. Dr Vardhan kinungtsü Nutan Goel-i pa meina aru.
Iba sentong nung Nagaland Chief Minister Neiphiu Rio, Health & Family Welfare Minister S Pangnyu Phom, Lok Sabha MP Tokheho Yepthomi, Principal Secretary Health Amardeep Singh Bhatia, Mon Deputy Commissioner C Thavaseelan K, Advisor Social Welfare, Home Guards & Civil Defence Noke Wangnao, Eastern Nagaland People’s Organisation (ENPO) lennirtem, civil society organisations, MLAs, state BJP ketdangsürtem aser tongti ketdangsür aika aden.
Tanü nikongdang Dr Harsh Vardhan-i Indo-Myanmar arrtsü nung aliba Longwa yimtsüng semdang.
Honibarnü Union Minister Dr Vardhan-i Kohima nung yangluba medical college reprangdangtsü aser World War-II cemetery nung semdangba sülen Imphal-i aotsü.