Mon nung Mock Drill Demonstration agiogo

Mon, Tsüklai/February 20, 2020 (TYO): Disaster Management Committee, Wangkhao College den Home Guards & Civil Defence, Mon longjemer Wangkhao College Campus, Mon nung February 20, 2020 nü Mock Drill Demonstration and Emergency method of Rescue sentong ka ayongzükja liasü, ta sangdong ka ajanga metetdaktsü.
District Commandant, Home Guards & Civil Defence, Mon, Ngongvai E. Phom-i jembiba mapang pai, lendongtem talisa menoknok mesüra tanga lendong balala nungi kümzüka alitsü asoshi tekümdangtsü sangdongtsü nükjidong nung iba demonstration ayongzüktsür.
Lendong ya kecha agia paidoktettsü makok aser iba ama rongdak mapangtem nung, item lendong balala nungi jenbotsüsa mesüra kümzüka alitsüsa asenok sasa renemshia alitsübaji dang lir.
Principal, Wangkhao Government College, Mon Dr. M. L. Ngullie-i, kaketshir aser faculty atema iba ama tekümdangtsü sangdongba atema District Commandant aser pa den külemi inyaker staff dang pelaba metetdakjamliasü.
Home Guards & Civil Defence, Mon-i Menoknok anokba, ibaji ajanga lendong bener autsüba aser iba atema renemshia alitsüba indang nung rasa ashi. Iba den külemi lisü alenba yimya balala, zübo alepbangba yimyatem aser lendong nungi kümzüktsü atema rongdak teinyaktsütem indang sayua liasü.
February 14, 2020 anogo nunga, District Jail, Mon nung Home Guards & Civil Defence Mon-i Mock Drill Demonstration and Emergency method of Rescue sentong ayongzükja liasü.