Mon nung NSCN-IM aser sepaitem tsüngda mepetmesü angatetep

Dimapur, February 10 (TYO): Deobar nungi Mon district nung NSCN-IM züngsemtem aser India sepaitem tsüngda mangatettep adoka tekong merangtepa aruba sülen tatem nung telok anaprongi tesem toktsütsü lemteta iba onük angatettepogo.
Mon district kübok NSCN-IM indang designated camp ji Nokyan lir saka iba tesem ano parnoki tesep mesemteta mali.
Iba tesem anasa Netong yim nung NSCN-IM züngsemtem anenzüka aliba toktsür oang ta CFMG chairman, Lt Gen. (Retd) NK Singh-i tetuyuba agütsü, ta CFMG Convener, Karibo Chawang-i ashi.
Iba sülen nungi NSCN-IM züngsemtemi designated camp nung masü saka arem nung temporary camp ka yanglua anenzüka liasü. Iba tesem ya NE telungpur teloktem senzüsenbongba tongti lenmang ka lir aser iba jagi NSCN-IM züngsemtemi ozüng alema mapa inyakba azüoktsü atema iba tesem nung tesep mesemteta liasü, ta Karibo Chawang-isa metetdaktsü.
CFMG chairman-i tetuyuba agütsüba nung ajemdaker Deobarnü sepaitem iba arem jagi aru aser NSCN-IM indang teseptem longpang. Sepaitemisa Jaboka aser Netong yimdaklirtem adenshidaktsü aser tetsür o tebur balala lemdanger ayu. Iba mapang sepaitemi yimdaklirtem aluia meyok aser anogo asemnü sota ayuba sülen February 9 aonung 7:00 ako meta ang chiok, ta NSCN-IM lennir-isa ashi.
Paisa ashiba agi, India nunger ketdangsertem den kanga meranga jembiba sülen ang iba onük angatettep.
NSCN-IM-i India sorkar den telemtetba ka angutsü atema jenjang temaba nung olemtep liyonga arur, saka iba yimjung maparen nung tetsükdaktsü ajurudaktsütsü atema anti forces-i mapa inyaker ama bilemer, ta Chawang-isa ashi.
Mapang shia CFMG chairman-i khuret bener arutsür anungji India sorkari süoki ia bilemer süra pa iba mapa nungi agientsüla, ta NSCN-IM tanishirisa metetdaktsü.
Iba tensa tajungba kümdaktsüba atema NSCN-IM-i India nunger ketdangsertem dang kanga pelar, ta paisa shisem.