Mon nung opium aser yi raksa endok

Dimapur, April 1 (TYO) : March 31, 2016 nü Mon nung KNSK-i District Administration, Excise Department, Police, Assam Rifles, Arogo lennirtem, Konyak Union, KSU aser sensotem tsüngdang sen lakh asem shi jenjang Opium aser yi raksa endok.
Yimya agi ibala ozüng alema shibelenba osettem puli raksa endoker saka tanbo Aoleang benjung atongtsü jakdang yimjak nung raksa endoktsü telemtetba agi, ta KNSK tir, Lomei Konyak-i o jembidang ashi.
Iba inyakyim ajanga temesepba amshirtem aser lokti dang KNSK-i inyakba mapa prokshitsü atema telemtetba agi, ta laisa ashi.
Iba sentong nung mulungtet teloktem, district administration, Police, Excise Department, Arogotem aser sensotemi shilem agiba atema laisa pelaba metetdaktsü.
Raksa endokba opium aser IMFL ji nisung ana ket nungi dang apuba liasü, ta laisa shisem.
Iba sentong nung Konyak Union Vice President, Executive Secretary KBBB, Konyak Students Union President aser EAC Sadar nungertemia o tatsütsü jembi.