Mon nung Rashtriya Poshan Abhiyaan sentong agi

Mon yimtak August 25, 2019 Deobarnü Rashtriya Poshan Abhiyaan nung awareness sentong agiba mapang Mon, SDO Chumlamo Humtsoe (tiyong nung noktaka alisang)-i telok den jembiba noksa nung angur. 

Mon, Luroi/August 26, 2019 (TYO): Mon yimtak August 25, 2019 Deobarnü Mon block Convergence Action Plan Committee-i Rashtriya Poshan Abhiyaan (National Nutrition Mission) nung awareness sentong ayongzükja liasü.
Iba sentong nung Mon block CAPC, SDO (C) & Chairperson, Chumlamo Humtsoe-i jembiba mapang pai, tanurtem timi mainba aser achi ajemtzü peria manguba nokdangtsü aser agientsü; iba denji külemi mapang shitak nung nüngdakba peridaktsütsü atema National Nutrition Mission nükjidong lir, ta ashi.
Iba awareness sentong ajanga nutritional jenjang melenshitsü aser tanurtem nem nutrition aketba chiyongtsü peria agütsüba asoshi tangazükba ka ama agütsüla, ta Chumlamo-i yimertem ajungshia liasü.
Sentong nung anganwadi workers-i Poshan Abhiyaan omen nung ajemdaker ken ka aten; nutrition nung ajemdaker local artists-i yimdong nung jilushi ayiba den külemi tsüngsanga liasü. Iba dak alia, yimertem dang Poshan Abhiyaan/nutrition indang Screen show sayua liasü.
Maneni, kasa awareness sentong nung mashisa alir tetsür aser tanurtem atema immunization aser anaemia video tem sayu. Iba sentong nung CDPO Mon, T. Yanlem mendenti liasü.
Rashtriya Poshan Abhiyaan (National Nutrition Mission) awareness sentong ya Poshan Abhiyaan kübok Information, Education & Communication aser Advocacy shilem ka ama ayongzüka liasü.