Mon nung Rota Virus Vaccine agütsüba sentong tenzükogo

Mon, August 02 (TYO): August 2, 2019 nü Conference Hall, CMO Office, Mon nung Rota Virus Vaccine (RVV) agütsüba sentong tenzükogo, ta ketdangsertem osang ka ajanga metetdaktsü.
Iba sentong nung jembidang Mon Deputy Commissioner, Thavaseelan K (IAS)-i health workers aser stake holder departments dang tajangzük angutsüpur ajak ayimjemtsü atema longjemer meranga inyaktsü ayongzük.
Paisa department dang RVV Vaccination Campaign nung tanur shinga mesendoktsü metetdaktsü.
RVV Vacine indang metetdaktsüdang DPO (UIP & RCH) Mon, Dr. Shasinle Tep-i, iba vaccine ya rotavirus infections nung kümzüktsü atema amshir; iba virus ajanga tanurtem tebok odaktsür, ta metetdaktsü.
Iba vaccine ya tanur arishi hopta 6 nungi küm ka tashi purtem nem agütsütsü, t alai metetdaktsü.
Mon district nung ayimjemtsüpur tanurtemji parnok 593 lir saka iba dangji timba akümtsüa akok, ta laisa shisem.
Pelaa agizükba o jembidang CMO Mon, Dr. Kechongol Sophie-i, asenoki rotavirus vaccine campaign ya junga agitetra tebok aoba agi shirangertem kanga ajema akümtsü aser district nung tanurtem health jenjang tajungba akümtsü, ta metetdaktsü.
Iba sentong tembanga DVBO Mon, Dr. Limatula Aier-i tepela anküp o jembia liasü.