Mon nung Science seminar agi

Mon, September 04 (TYO): Mon nung Directorate of School Education, Government of Nagaland-i District Education Office, Mon den senteper September 3, 2019 nü GHSS, Mon nung “Periodic Table of Chemical Elements: Impact on human welfare” omen nung ajemdaker District Science Seminar ayongzüka agiogo, ta ketdangsertem osang ka ajanga metetdaktsü.
Iba sentong nung jembidang ADC Mon, Hiazu Meru-i iba ama sentong ka nung shilem agia adenba atema pelar, aser iba ama sentong ayongzüka agiba ajanga lanur kaketshirtemi scientific shisatsü angutsü, koba ajanga parnok aindang scientific shisatsü amshia shisadangtettsü, ta ashi.
“Asen linük putiotsü nung putiotsü zülur aikati India ya per puaertem, sadus aser tamangba yimsü tsütsü alia bilemertem aliba lima ta shia lir, iba denji külemi anüdoklen alima linüktemia asen linük ya yamaji ta bilemba indang züluogo. Tangbo ibaji tangatetbaji melenshiogo, ajisüaka asen linük noksa tajungba akümtsü atema science & technology nüngdaker,” ta pai ashi.
India ya kin, tamangba yimsü aser nübur temeyoktep aika aliba linük ka lir, ibayongji asen linük nung telemsa adoker. Asen state nunga kasaji atalokdar,” ta pai ashi.
“Asenok melungjang nung kin balala bendanga züngshiba shisatsü tang tashi lir. Itemji toktsür asenok melungsentsü ulushitsüla, scientific shisatsü alitsüla aser shisa kaa shisadangtsüla, ibaji ajanga asen lokti nung telemsa aliba ajema akümtsü,” ta paisa ashi.
Asen taküm nung scientific ajanga libaliro tezüpaba kümdaktsüogo, ta shia ADC-i, tanübo atangji asenoki alima ya yimtsüng ka dang lir ta shitetter, iba denji külemi asenoki advancements ajanga lendong balala ajuruba indanga meteta alitsü nüngdak, ta ashi.
Scientific shisatsü ajanga takok angur nisung kar indang lemsatepa pa kaketshirtem dang shisa ulushitsü aser shisa kaa shisadangtsü ayongzük.
“Periodic Table of Chemical Elements: Impact on human welfare” onük nung tetoktepba ka agi aser iba nungji school 18 nungi kaketshir 20-i shilem agia liasü. Iba tetoktepba nung mezüngbuba jenjang angurji Sacred Heart School, Mon nungi Shongmeth M Konyak liasü; tanabuba aser tasembuba jenjang nung takok angurji Model School, Mon nungi Aphot Konyak aser Green Valley School, Mon nungi Mina Chetri na liasü.
Iba tetoktepba nung mezüngbuba jenjang nung takok anguri September 11 nü Mokokchung nung ayongzükba State Level Science Seminar nung shilem agitsü.