Mon nung telungpur 3 den army ketdangser ka khaset

Kohima, June 7 (TYO): Nagaland kübok Mon district nung sepai aser telungpur tsüngda khatepdang 164 Territorial Army (TA) ketdangser ka den civilian ka dena nisung pungu asü, ta tanü osang metetdaktsü.
Iba lendong ya Tizit sub-division kübok Lappa yimtsüng nung yasüng atalok aser army jawan asem yirur anepaludar.
164 Territorial Army (TA) nung tasüsangji Major David Manlun ta jangjaogo aser yirua alirtemji Assam kübok Military Hospital Jorhat nung anepalura, ta defence otongdar kati ashi.
NSCN(K) aser ULFA külem telok ka Lappa tesem nung lir ta osang tejangja angazükba sülen yasüng 11:00 ako meta Headquarter Inspector General Assam Rifles (North) kübok TA aser 12 Para sepaitemi iba tesem mita aodang khatep, ta otongdarisa shisem.
Sepaitemi maneni iba tesem nung telungpurtem bushidar aser tasümang asem ngutetogo saka parnok indang maitsü ano mejangjateti lir.
Iba tesem nung sepaitemi AK-56 ka, AK Chinese made 2, grenade 2, IED 3 aser injang round 270 ngutetogo.
Ano külen, Tizit nung police osang ka ajanga ashiba agi, ULFA züngsemtem ta temulung melemi bilemer nisung asem den parnok mena aliba auto-rickshaw indang driver dena khaset.
Telungpurtemji koba telok nungi’ar mejangjatet saka parnokji auto-rickshaw ana nung mener lia sepaitemi amak.
Mezüngbuba auto-rickshaw nung mena alirtemjibo jena ao saka tanabuba nung mena alirtemji khaset. Iba tatalokba atema bushisüngdang ka tenzükogo, ta police-isa metetdaktsü.