Monalisa indang kaket ‘Middles’ sayatsü

Dimapur, Luchii/December 02 (TYO): Senior Journalist, kaketzülur aser sangro zülur, Monalisa Changkija-i züluba kaket tasenba ‘Middles’ December 03, 2018 nikongdang 3:30 ako nung Foyer, NDBA Hall (Bamboo Pavilion temalen), Kisama nung sayatsü; iba kaket ya Heritage Publications-i adoktsür, ta osang ka ajanga metetdaktsü.
Kaket sayaba sentong ya Heritage Publications, aser Wordsmithereens (NEWF), Nagaland Chapter of the North East Writers’ Forum-i ayongzük.
NBCC General-Secretary, Reverend Z Keyho-i iba kaket sayatsütsü.
Iba kaket indang lemsatepa Professor (Rtd) aser taoba mapang HoD English, Nagaland University, Dr AJ Sebastian-i, otsüno aser otsü aika keta aliba kaket nung Monalisa Changkija-i la taküm nung tatalokba balala indang lemsatepba den külemi teshisadangba shisa tasen lemsateper, ta metetdaktsü.
Novelist aser translator, Mitra Phukan-i, iba kaketji jangratemtsüka aser tangar angateta züluba kaket, lai ajangshia arubatem nungi lai asadangtetbatem lemsatepa lir, ta metetdaktsü.
Sebastian Zumvu-i “Monalisa Changkija denbo tezüdangtsü mapang mali. Lai tazüngertemji onük balala ajanga tanga lima kati anir aoer. Tang lai züluba otsünotem ajanga tazüngertemi tatembangbuba page matong tashi ka khen ka khen ta kaket tapak lushia azüngtsü,” ta metetdaktsü.
Sangro zülur, Mona Zote, kaket zülur aser sangro zülur, Mamang Dai aser kaket zülur, Dhurba Hazarika nungeria iba kaket zünga Monalisa Changkija nem tenüngsang agutsüogo.