Money Circulation Schemes nungi jenbua alitsü merangang

Dimapur, October 14 (TYO): Tanü-asüng Nagaland nung nisung ashioktsüba aser külakoktsüba tatalokba aika ajurur. Nagaland nung aser tangalen nungi taila Company/financial institution/telok aikati Prize Chits aser Money circulation maparen inyaker.
Nagaland nung nisung noklang aika sen jentisa jenti akoksaogo aser Nagaland nung taila company tem aika lir aser parnok rongnung, Queensberry Foundation, Everlight Realty infrastructure limited/Everlight Realcon infrastructure limited (ERIL), Progressive Youth Welfare Society, Progressive Youth Thrift and Credit Cooperative Society Ltd nungertem lir, ta SP(Crime) &PRO, PHQ, Nagaland, M.Tungoe, IPS-i sangdong ka nung metetdaktsü.
Item taila company temi Direct marketing (DM), Multi-Level Marketing schemes (MLM), Network marketing (NWM), Referral Marketing, Introduction Marketing, Chain Marketing amala tenüng amer Money Circulation Schemes inyaker, ta paisa ashi.
India nung Prize Chits & Money Circulation Schemes (Banning) Act 1978 ajanga Money Circulation Schemes nokdanga lir, aser taila company temi products aser services ajanga nisungtem mesür saka shitakba jibo parnoki Money Circulation Scheme ang inyaker.
Scheme ka nung züluoka alir nisung kati tangar ka initial kit / membership amount agütsüdakja aser goods & services alidakja aniokba inyakyim ajaki Money Circulation Scheme kübok aittsü. Iba inyakyim nung nisung tasen aniokertem sen angur aser iba mapa inyakba company sen aazüker, ta SP(Crime)-isa sangdong nung shia lir.
Paisa ashiba agi, züngsem tasen akümer jagi pa/lai sen agütsüba meyipa angutsü aser ano tanga tajangzük angutsü atema züngsem tasentem bushia anioker. Iba amai züngsemtem sendaktepa inyakba mapa ya mapang ka nungbo tetsükdaktsü akümer aser idangji tetenzüklen züngsem akümertem tajangzük nung aser tesülen adenertem takoksa nung tembanger. Tatem nung züngsemtemi angateta arudangbo teimla kecha mali asür aser takoksa nung dang anener.
Anungji, nübortemi item amala scheme inyakba company tem dang nungi jenbua alitsü aser parnoki ayuba sang nung mepudaktsütsü merangang. Police-i aibelenertem pua arutsü akok saka senotsü angutsü jibo kanga tasak lir, ta SP(Crime)-isa metetdaktsü.
Tawa tu, police-i ibala Company ka nung CEO puogo saka pa ket nung sentsüh odoktsü atema sen maliasü. Company kari danga ibala inyakyim ajanga nisungtem mesüzükba angazükra tekaratiba nung police nem osang sangokjang, ta sangdong nungsa shia lir.