Mongintemi menonok anokba tesem semdanger

Imphal, January 08 (Agencies): Indian Institute of Technology (IIT) Roorkee nungi nisung asem agi akümba mongintemi Imphal nung tan hopta takoksa agütsüba asadangtsü asoshi arua lir.
Menoknok ajanga takoksa bener arutsüba aser ki atensar mesüra chireper alibatem asadangtsü asoshi state sorkari IIT Roorkee nungi mongintem jaok.
Indian Institute of Technology (IIT) Roorkee nungi menoknok engineering nung Professor, Dr. Yogendra Singh-i, ki aika atensaa lir aser item ki nung alitsü lendong lir, ta ashi.
“Ki aika kangasa mejungi atensaogo aser state nung ketdangsertemi kanga shisa ka item ki azüngtetdaktsüogo. Anungji item ki nung shinga malitsüla aser alitsü bilemra kanga junga yanglushiba sülen ang alitsüla,” ta pai ashi.
Paisa ashiba agi, atensar aliba kitemji raksatsü nüngdak mali kechiba süra item ki kanga junga yanglushitettsü.
Imphal nung aliba nüngtugu shishilembaba tesem, Ima Keithel nung tetsür shishilembartemi state sorkar dang parnok atema tesem tasen ka agüjang ta takhangba agüja lungkak aiter.
Parnok ya joko anogo ishika Manipur sorkar dang kasa takhangba agüja lungkak aiterba lir.
U.S. Geological Survey-i Iba menoknok tesashi ya 6.8 magnitude liasü ta bushitetba osang metetdaktsüogo aser kasa menoknok ajanga India anüdoklentip aser Bangaladesh linük tem nung anü junga madok tsüngda kongshia liasü.
U.S. Geological Survey- ajanga ashiba agi, iba menoknok ya ali telung nung kilometre 57 ia anok aser Imphal anüoleni kilometre 29 orr anok.
State nung 1957 küm menoknok kanga sashia anokba sülenbo tan anokba ya tesashiba liasü, ta department of seismological research at Manipur University-i ashi.
Bangladesh aser Nepal nunga iba menoknok agi tera konshiogo aser iba den külemi Myanmar yimtiba Yangoon nunga kongshi.