Mongolbarnü Assam nung MLA 14 tenangzükba agitsü

Guwahati, May 22 (Agencies): Mongolbarnü Guwahati nung Chief minister atema tenangzükba agitsü alisang, Sarbananda Sonowal den Himanta Biswa Sarma densema BJP-AGP-BPF teloktep nungi MLA 14 tenangzükba agitsü.
Chief minister densema state nung timba agi minister 19 tashi dang alitsü lateta lir.
Ajak liromedemtsüsa BJP-i AGP aser BPF naprong nungi minister anana shimtsüa akok. AGP-i assembly speaker menden angutsü, aser iba menden atema taoba mapang Tir, Brindabon Goswami shimtsüa akok.
AGP nungisa party Tir, Atul Bora aser taoba deputy speaker, Renupama Rajkhowa nata minister shimtsü akok. BPF nungi Chandan Brahma aser Pramila Rani Brahma na shimtsüa akok, tenaprongla ya 2006 küm Congress-BPF teloktep nung minister liasü.
Sonowal-i home aser political portfolio agitsüa akok aser BJP lenir, Sarma finance portfolio angutsüa akok. Tang tashi nungbo BJP-i taoba CM aser AGP lenir, Prafulla Kumar Mahanta nem kechi lemzüktsütsü’ar mejangja.
BJP nungi Muslim nunger MLA ka dang lir aser pa (Aminul Islam Laskar) nema minister menden lemzüktsütsüa akok. Taoba mapang Union minister, Bijoya Chakravorty’er jala, Ano tetsürtem quota nungi Suman Haripriya-a shimtsüa akok.
BJP nungia Hiten Goswami, Tapon Gogoi, Atul Bora, Prasanta Phukon, Sidhartha Bhattacharya, Ranjit Dutta aser Parimal Suklabadya nunger nem ministry agütsütsüa akok.