Mongolia: Parliament-i Ato Kilonser tasen shimer

Ulaanbaatar, July 08 (Agencies): Mongolai’er parliament-i par Ato Kilonser tasenba inyaktsü asoshi taoba Mongolia Finance Minister, Jargaltulga Erdenebayar tanü, Hokolbar nü shimogo.
Mijang, taribi aser hon jenti angudak, Mongolia nung rongsenren temelenshi agiba sülen par linüki rongsenren tebilemtsü khuret benokba mapang ka nung par parliament-i Ato Kilonser tasenba tanü shimer lir.
Taoba June ita agiba parliamentary election nung tongti opposition telok, Mongolian People’s Party (MPP)-i temaba jenjang ngua Mongolia madak yimsü asütsü temten ngua liasü.
Arishi küm 42 tain Erdenebayar-i tan Ato Kilonser menden abentsü temeten anguba jakdang pai küm 1 shi Finance Minister inyaka liasü.
Pa jakdang Chimed Saikhanbileg-i Mongolia Finance Minister menden bena liasü saka pa züngsemba Democratic Party (DP) aser MPP telok na tsüngda tesendaktep mejungi akümba sülen pai yimsüsütsü mendenji toktsü.
Ano külen, MPP telok lenisang, Miyegombiin Enkhbayar-i parliament mendenbuba inyaktsü temeten nguogo aser pai par sorkar inyakyim nunga shilem agitsü renemba osang angazükogo.
Taoba mapang Soviet Union kübok densemba Mongolia-i 1990 küm nungi tenzüka linük tasen ka tentetba sülen par linük anguba ali telung nungi tutetba rongsen tajangzük angutsü nükjidong nung bendanger shishilembartemi par linük senotsü jenti inoktsüba osang bushiteta lir.