Mongsenyimti nung Tesayur-tem meraketja tushia among

Mokokchung, September 05 (TYO): India linük ajunga nung 55 buba Tesayur-tem anogo September 5, 2016 nü amongdang, Mongsenyimti yimtak aliba school pongu nungi tang teinyakdak tesayurtem ajak nem tetushi agütsüba sentong Mongsenyimti Baptist Arogo (MBC)-i sponsor süa aser Village Education Committee (VEC)-i ayonga Mongsenyimti community hall nung takok ngua agiogo.
Sentong nung “A Prudent Teacher Affects Eternity” onük nung ajemdaker Mr. Imli Ozükum, Pastor MBC-i jembidang, tesayur kaji shisaluyimer ka tarutsü tia atema tejang tangtetdakja anitetdaktsüba nung shilem agir tajung ka-ka asütsüla ta ayongzük. Paisa tesayur kaji linük atema shisaliok agütsür nükdang tajung ka dang masü arogo, yimten aser lokti balala ajak nung tongti shilem agir ka-ka asütsüla ta ashi. Paisa tesayur mapajibo ajaki inyaktettsü akok saka pei dak sempet aliba tejangja angateta aliba tesayurtem asütsü nüngdaker ta ashi.
Mr. Putiwapong President, Mongsenyimti Kaketshir Telongjem-i ketdangsüa agiba sentong nung Imti Pastor MCBC-i moaja sarasadema tenzük aser Mr. Benjungyapang AHM GHS Mongsenyimti ajanga tayongzükba O jembi aser school pongu nungi shisaluyimer tanurtemi shilem balala agia tesayur-tem nem tetushi agüja meraketa takok ngua agia liasü.
Sentong nungsa Mr. T. Yanger Ozükum VEC Chairman-ia Mongsenyimti Baptist Arogo ajanga tesayurtem anogo sponsor süa mongtsüba atema Arogo nung Pastor-i anir tenzüker-tem ajak dang pelaba lemsatep aser taruba küm-tem nunga lokti balalai tang ama kasa sentong ayonga mongtsütsü ayongzüka liasü.