Mongsenyimti nung Tesayurtem meraketa tushi

Mokokchung, September 06 (TYO): India linük ajunga nung 54 buba Tesayurtem anogo September 5 nü amongdang, Mongsenyimti yimtak aliba school pongu nungi tang teinyakdak tesayur aser retire sür alir tesayurtem ajak nem tetushi agütsüba sentong ka Mongsenyimti Compound Baptist Arogo-i sponsor süa aser Village Education Committee (VEC)-i ayonga GHS, Mongsenyimti nunga takok ngua agiogo.
Sentong nung “Tesayur kaji taküm tesüngmangtsü jenjangi anitetba nung apular” ta asüba onük nung ajemdaker MCBC sannüker Wb. Imti-i jembidang, tesayur kaji linük atema shisaliok agütsür nükdang tajung ka dang masü, arogo aser tanüla tsütsü ajak nung tongtipang shilem agir ka-ka lir ta ashi.
Paisa, asenok meimchir ajak ya tetsü ka nu menden nungi aruba sülen shisaliok jibo tesayur ajanga dang agütsür, anungji tesayur ka dakji lesson sayuba kisüng masü saka lenla ajak nung shisa tajung aika alenloka alitsü nüngdaker ta ashi.
Wb. Imti-isa Laishiba tsütsü nungi benoka jembidang “Yisu Khrista-a shisatsü nung ainba… Luk 2: 52 nung shia aliba atishia taküm ka nung shisatsü ta asübaji kangasa tongtipangtiba lir, ta ashi.
Sentong nungsa retired tesayur Aokumzuk-ia tayongzükba o jembidang, tesayur ka atema tongtipangtiba rongsenji sen, hon mesüra alima konangji masü saka tanur ka shisaliok tajung agüja intetdaktsübaji tesayur atema rongsen tulutibaji lir ta ashi.
Paisa tesayur ta asübaji senmang ka amai akhümtsübua amshitsüla ta sentepa aliba tesayurtem ayongzüka liasü.
Sentong nungsa I. Temsümangyang VEC Secretary-i jembidang, tesayurtem anogo amongtsü atema A. Senti Jamir (Kohima)-er kibongi rongsen tulu agütsüba tepela lemsatepba den GHS, Mongsenyimti nungi tesayur Mrs. Rongsenmongla Hindi Teacher-i ‘Sub-Divisional Teachers’ Award` ngutetba tepela tenüngsang agüja liasü.
Miss Odirenla (Class 10)-i ketdangsüa agiba sentong nung shisaluyimer tanurtemi shilem balala agia tesayur-tem nem tetushi agüja meraketa takok ngua agia liasü.