Montenegro NATO nung züngsemtsü jaoker: Stoltenberg

Brussels yimti nung ayongba NATO foreign ministers senden nung shilem agiba jakdang Montenegro Defence Minister, Milica Pejanovic-Durisic (Abelen)-i NATO Secretary General, Jens Stoltenberg (Achijilen) den ajurutepba noksa nung angur. (Brussels, December 02)

 Brussels, December 02 (Agencies): Montenegro linük North Atlantic Treaty Organization (NATO) nung züngsemtsü tejaokba olen ka NATO Secretary General, Jens Stoltenberg-i tanü Bobar nü sangoktsüogo.

2009 küm sülenbo tan mezüngsüa NATO tentet ulushitsü maparen tenzüka Stoltenberg-i Montenegro NATO nung anioksemtsü asoshi tanü sangoktsür lir.

“Taoba mapang Yugoslavia linük nung densemba Montenegro linük NATO nung züngsemtsü ya otsü tasen ka yanglur asütsü,” ta tanü Brussels yimti nung amenba NATO foreign ministers senden nung Stoltenberg-i metetdaktsü.

NATO nung züngsemtsü nükjidong nung Montenegro linükia nungdakba temelenshi agia aruogo saka par lenirtemi NATO lenirtem den tangatettep tajung agiba sülen ang Montenegro-i NATO züngsem ka kümtettsü.

“NATO nung züngsemtsü asoshi ozü Montenegro linük jaokba ya ozü linük nem maongka tulu agütsür lir. Ano, iba maongka ya küm 9 tejaklen nungi tenzüka Montenegro linük tenteter tanü tashi nung ozü linüki maongka tulutiba angur asütsü,” ta Montenegro Ato Kilonser, Igor Luksic-ia tanü senden nung lemsatep.

“Nütsüng yongsük nisung 650,000 shi densemba Montenegro linüki maneni temelenshi agitsü nungdaka lir,” ta shia, par linüki ochimashi aser ozüng alema inyakba anema maneni raratsü tenangzükba ka pai metetdaktsü.

Ano külen, “Montenegro linüki NATO nung züngsemra, par linük den shishilembateptsü densema, tesendaktep kecha mayutsü,” ta shia, Montenegro linük NATO nung mezüngsemtsü amokmerenba olen ka Russia-ia tanü metetdaktsüogo.

Montenegro den kidangsüa aliba Croatia aser Albania linük nata 2009 küm nungi tenzüka NATO nung züngsemba osang jangjaogo.