Montenegro NATO züngsem akümer

Brussels, May 20 (Agencies): Mongtenegro linük North Atlantic Treat Organization (NATO) nung yashi, Brehostibar nü züngsemogo.

Montenegro Ato Kilonser, Milo Dukanovic-i repranga lia, NATO tesepti, Brussels nung NATO foreign minister-temi Accession Protocol yashi zülutepa, Montenegro NATO züngsem 29 buba akümtsü asoshi agizükba osang jangjaogo.

Ajisüaka, US Senate densema, NATO nung züngsemba linük 28 prongla nungi yimsüsürtemi yashi zülutepba Montenegro NATO nung züngsemtsü shitiji agizükba sülen ang Montenegro linüki NATO tentet nung züngsemtsü temeten asangsang nung angutsü.

“Balkans nung tensa tajungba kümtsütsü inyakba densema, Montenegro linüki NATO, European Union (EU) aser United Nations (UN)-i ayongba mapatong balala nung amalitepa yariteptsü tenzüka lir,” ta shia, NATO Secretary General, Jens Stoltenberg-ia Brussels tesepti nung linük 29 indang wako metongtsü imlaba olen ka metetdaktsüogo.

Ano külen, Montenegro NATO nung züngsemba ajanga NATO tentet par arrtsü atongtsü tsüboa, Russia-i Montenegro linük anema tenokdangba sentongtem benoktsü amokmerenba olen ka metetdaktsüogo.

Montenegro linük ya tesüiba mapang Soviet Union kübok densemba Yugoslavia nung republic ka liasü saka par linüki 2006 küm nüchiso ngua, tanübo peisasa pei madak yimsü asütsü temeten ngua lir.