Monupii 7 nü Malaysia nung general election agitsü

Kuala Lumpur (Malaysia), Rongchii 11 (Agencies) : Taruba Monupii (May) 07 nüji Malaysia nung general election agitsü anogo shimtetogo anungji, nüburtem nem vote agütsü mechi panüji sodi anogo asütsü, ta tanü Rasemnü Malaysia Ato Kilonser, Najib Razak-i metetdaktsüogo.
Mapa inyakba anogo ka nung vote agütsütsü ta Election Commission-i metetdaktsüba sülen anogo ka lir nüburtem jashiba sünemdaktsütsü nükjidong nung ajungbena dang iba telemtetba ya agi südi ta nüburtemi bilemer.
Taoba mapangtem nungbo teti hopta tatemnüsa (weekend) election agia aruogo.
Iba maparen dak sendakba shisadangertemi ashiba agi, mapa inyakba anogo ka nung election agitsü anogo shimtet aserbo nübuyimtsü asoshi tamalen dang nungi tan ya mapang tatsüba asünung vote agütsür ishiba asütsü südi aser opposition telok nungitertema karbo pakzüka aotsü akok ta temulung malem bilemer.
Tanü Najib office nungi sangdongba osang ka ajanga ashiba agi, May 9 nüji sodi anogo asütsü lemtetogo anungji nübur million ter pongu shii vote agütsütettsü.
Asembenren ato kilonser menden nung amentsü nükjidong yur Najib-i inyakdagi saka taoba election anaprong nung pa nungitertem ajema akümba ajanga pai aniba ruling coalition sorkar ajungkettsü atema pai kanga nendaka inyaktsü nüngdaker.