Moore-i Donald Trump documentary film sayaogo

New York, October 19 (Agencies): Taoba mapang Oscar sempet agizüker documentary film yanglur aser kaketzülur, Michael Moore-i Republican yimtenren telok nungi US Tir menden atema candidate ama toktepsang, Donald Trump den sentakba documentary film ka US kübok New York yimti nung sayaogo.
‘Michael Moore in TrumpLand’ film-ji New York kübok IFC Center nung yasüng, Mongolbar aonung angati agi sayaba osang ka hollywoodreporter.com-ia metetdaktsüogo.
Minute 73 talang film-ji tanü, Bodbar nü nungi tenzüka, IFC Center aser Encino kübok Laemmle Town Center 5 na nung hopta 1 tashi sayutsü sentong lir.
“Taruba anogo 10 tsüngda nung America nüburtem nem iba film ya reprangdaktsütsü alizüng lir,” ta film sayatsüdang Trump anemsang, Moore-i metetdaktsü.
Democratic yimtenren telok nungi US Tir candidate, Hillary Clinton aser Trump na rong nung shibai US Tir menden abentsü jenjang angutsü aser kasaji anguba ajanga temelenshi bener arutsü indang Moore-i jembia sayuba filmji Ohio state kübok Wilmington nung hopta 2 tejaklen tangokba osang jangjaogo.