Mopong agi anünger

Tanü putu nungbo alima nung angati angutsü kecha maka, ajak sen agi alitsüba dang, anungji sen maker asoshi alima nung alitsü kanga tasak kümogo. Aji oda, akhidangbo angati ayong tzü teka agi metemteta jema aliba to, tanü asüngbo ayong tzü tajem majung kümogo aser tzübo ajak kongadoker, anungji joko tzü dena alia ajemer. Ajisüaka, taküm alitsü asoshi nüngdak ajak dang tongtibangtiba mopongbo angati angur. Atangji, moponga akhidang amato temerük tajung masü saka tanü tashibo angati angur. Science-i ashiba agi, kodang asenok tango sashitsü atema mopong asükettir, idangji mopongji tepokboki iadoker aser tepokbok nung jagi oxygen ta ajaba mopung tapu ka azüi aoer aser ano azü nung jagi carbondioxide ta ajaba menüngdakba mopong tanaben tepokbok jagi meyipa yoker aser tepokbok nung jagi asen teni ajanga sadoka endoker. Iba amaji mopong tapu ana oxygen asüketli aser carbondioxide sadokli ta maneni melentepa tango sashiba ajanga nisung taküm alir. Asenoki aji melamelar amai bilemer, kechiyong mopong agitsü atema kecha balaka belemseta mapa talila ka meinyaker aser senotsü endoka malir, mopong yabo odang parnoksasa angati arur. Ajisüaka, tang ama Covid-19 tashidak agi tonger tangoa mesashiteti kodamasü shirangba mapangang, asenok anema alidang oxygen angati talubosa anguba jenjang to angatetter. Aji oda, tang India nung shisabolu tulutibaji Covid tashidak wara aruba agi masü, mozü kidang yipten , mozü aser doctor-tem agi meperiba agia masü saka oxygen agi anünger. Asenok anema alidangbo Tsüngremi asenok nem angati agütsüba oxygen to asensasa agitet saka tangbo asensasa magiteter, anungji nisungi yanglua agütsütsüsa akümer. Aji oda, oxygen yanglua magütsütetba ajanga Maharashtra state nungbo Covid-19 agi shiranger aika süogo. Maharashtra state nung ya Shiv Sena-i anir NCP aser Congress teloki yimsü asür. Iba jagi center nung BJP teloki aniba government-i parnok dangi oxygen aser Covid mozü peria meyoker ta Maharashtra state government nung lenirtemi bilemer. Ibaji shitak asünungbo center government-i pei nübortem anema tsükchir danga tamajungba inyaker asütsü. Iba jagi Maharashtra nung Shiv Sena, NCP aser Congress yarirtem dang masü saka BJP yarirtem dena kasasa lendongi aitsü, kechiyong nübortem ajak asoshi Covid mozü kibo kasasa lir. Ibaji center government-ia angateta alitsü, anungji Maharashtra nung oxygen agi meperi anüngbaji opposition teloki yimsü asüba state asüba agi asaa oxygen meyok masü saka linük nung shitakba oxygen agi meperi aküm asütsü ta bilemer. Atangji, tangbo Covid wara ya ajungbena arur masü saka imlaa alidang arur, anungji India ama, Covid nokdangtsüba mozü yangluteta tangar kintem dangia yokba lima ka nung oxygen agi meperi nisung südaktsüba mapa aser otsüji center government atema tamakok tuluka asütsü. Reprangdangra, center government nung alir yimsüsürtemi anir yimten lenirtemi Covid-19 tashidak wara nokdangtsü asoshi lemtetba sentongtem sülen kenyongi manidaker. Covid wara nungi kümzüktsü asoshi tangar anasai maotsü ajungshir saka election atemabo nisung meyirijang metsü semer adenshidaktsür. Ano, tamangba yimsü dak aketba benjong nungbo nisung meyirijang dak tali ayong nung adenshia tzü chigur. Iba amaji kecha hau ta mali ita junga telok telok senden lia jajaba mapang Covid wara mopong tanaben arur. Atangji, tang aruba tashidak wara yaa Covid-bo Covid-19 saka tamasaba dang nungibo tang ya tesashiba ta medical mongintemi ashir. Tamasaba nung tobo tanur aser lanurtem dakbo matong saka tangbo tanur tain ta mali, ajak dak atonger. Iba ama tashidak wara tesashiba akümdang, yimten lenirtemi anir tali kümdangshitsüla aser kechisüdir süaka mozü kidang yipten, mozü aser oxygen-bosa peria angutsüsa, kechi teloki yimsü asür ta masü saka ajak India nunger ta asüba tangatetba nung ato kilonser, Narendra Modii anir rongdaknüngdaka inyaktsü imlar.