Mopung memeneni Diwali mongdi: Tir Kovind

New Delhi, October 18 (Agencies): Bodhbarnü linük Tir, Ram Nath Kovind-i nüburtem dang mopung memeneni Diwali amongtsü ayongzükba den külemi tatong Tir, M. Venkaiah Naidu tenati Diwali benjung salem lemsatep.
Sangdong ka ajanga Kovind-i, “Mopung memenentsüi Diwali amongtsü aser azükarua loktiliba aser linük yangertsü atema asenoki tenangzükba agidi. Asenoki asen tepela nüngdakbapurtem den lemsatepdi,” ta ayongzük.
Tirisa, “Tepela Diwali benjungmong mapang ni senso ajak den tepela salem lemsateper,” ta metetdaktsü.
Diwali benjung ya tammang madak tesangwa aser tamajung madak tajungi takok anguba benjung lir, ta pai ashi.
“Iba benjungmong nung asenoki tepela aser azükaru ajanga ajak taküm sangwadaktsütsü aser temeim proktsü atema merangdi,” ta paisa ayongzük.
“Iba benjungmong ajanga asen taküm sangwadaktsüdi aser tesünep, azükaru aser tepela lenmang nem asenok anidaktsüdi. Asen linük nübur ajak den ni tepela salem lemsateper,” ta paisa metetdaktsü.
Ano külen Lok Sabha Speaker, Sumitra Mahajan-ia nüburtem dang Diwali benjung tenüng nung nüngdakbapurtem nem süoshi, nanglong aser sempet balala agüjang, ta mepishia metetdaktsü.
“Iba Diwali benjung ya asenoki kinungertem aser medemertem den benjungba dang masü saka asenoki langka tasen inyakdi,” ta Speaker, Mahajan-i ashi.
“Asenoki iba benjung ya sensaker aser nüngdakbapur dang temeim mapa sayua mongdi. Asenoki langka tasen inyakdangtsüla,” ta laisa ashi.