Mopung menenba agi 2015 küm India, China nung mn. 1.6 asü

New Delhi, December 03 (Agencies): Fossil fuel ajanga mopung mejungi menenba ajanga China aser India na nung nisung million 1. 6 süogo, ta osang ka ajanga ashi.
Fossil fuels, talisa nagmati maneni amshiba ajanga mopung tamajungba menena linük ana nung nisung million 1.6 süogo.
Linük GDP timba akümdang mopung menenba tajemba akumer, ajisüaka tawa linük ana rongsenkettsüng inaka China aser India na nung mopung tamajung lir.
“1990 küm nungi tenzüka China aser India na nung mopung menenba ajanga nisung asüba rates ajema kümaka tanga linüktem den medemdangra linük ana tamajungba lir. India nungbo 2010 küm nungi rates tajungba makümer. Linük anaprong nung mopung menenba ajanga nisung jenti asüba tongti kuliji nagmati maneni amshiba ajanga lir,” ta kasa osang ajanga ashi.
Mopung menenba ajanga 2015 küm India nung nisung 1,00,000 shia nungi nisung 138 asü aser China nunga nisung 1,00,000 shia nungi 115 asü, ta kasa osang ajanga metetdaktsü.
High income linüktem den medemdangra, mopung menenba ajanga nisung asübaji India nung pezüben agi timba lir.
Aima ajungalen anojungi nisung asüba tongti külitem rongnung mopung menenba densema lir, aser ibaji moko mesepba ajanga asüba rate den tera agidang tajemba lir.