Mopung menenba agi küm shia India nung nisung million 1.2 asür

New Delhi, April 03 (Agencies): Mopung menenba agi küm shia India nung nisung million 1.2 dak tema asür, ta State of Global Air 2019 osang ajanga metetdaktsü.
State of Global Air 2019 osang ajanga ashiba agi, mapang talanglang kilung aser kima nung mopung menena alidak kazüba ajanga stroke, diabetes, temelungjang tashidak aser tepokpok cancer agi 2017 küm alima nung nisung million 5 dak tema asü.
“Item nungjagi million 3 bo PM2.5 (mopung kanga menenba) agi asü, aser asürtem nungjagi tesadang kabo India aser China na nungi lir. Alima nung mopung menenba agi asürtem rongnung shilem tesadang kabo China aser India na nungi lir, ta bushitetogo. 2017 küm mopung menenba agi linük anapong shia nung nisung million 1.2 asü,” ta kasa osang ajanga metetdaktsü.
Tanü iba osang ya US nung amenoka aliba tentet, Health Effects Institute (HEI)-i sangdonga liasü.
HEI-i ashiba agi, India nung nisung timtima südaktsüba kulitem tarensen jenjang asembubaji mopung menenba kuli lir, iba sülen moko achiba kuli lir.
Kasa osang ajanga ashiba agi, tang amaidang mopung menenra tanü South Asia nung asoba tanur ka arishi küm ana ser tesadng agi tajemba akümtsü, aser tanga linüktem nung asoba tanur arishi ka küm ka ser ita ti agi tajemba akümtsü.
Mopung menenba nokdangtsü atema India sorkari Pradhan Mantri Ujjwala Yojana, Household LPG program, Bharat Stage 6/VI clean vehicle standards aser National Clean Air Programme benoka lir, aser ibaji ajanga taruba kümtem nungbo mopung menenba ajemtsü imlar, ta Vice President Health Effects Institute, Robert O’Keefe-i metetdaktsü,