Mopung menenba ajanga kümshia India nung nisung 2.5 mn asür

New Delhi, October 20 (Agencies): Alima nung mopung aser tzü menenba ajanga nisung timtiba asüba linükji India lir, aser 2015 küm item kuli ajanga India nung nisung million 2.5 asü, ta study ka ajanga metetdaktsü.
India nung asürtemji timbaka mopung menenba ajanga adokdaktsüba tashidak balala- temelungjang tashidak, stroke, tepokpok cancer aser chronic obstructive pulmonary disease (COPD) ajanga asü, ta research agirtemi metetdaktsü.
Iba study ajanga ashiba agi, 2015 küm alima nung nisung million 6.5 asübaji mopung menenba dak sendaka lir. Iba den kasa kasa küm nung tzü menenba dak sendakba nung nisung million 1.8 aser mapa inyakba tesemtem nung chemical ajanga nisung million 0.8 asü.
Research agirtem rongnung New Delhi nung aliba Indian Institute of Technology (IIT) aser US nung aliba Icahn School of Medicine nungi züngsemtem lir.
Parnoki ashiba agi, tzü aser mopung menenba ajanga asürtem rongnung shilem 92 shibo low aser middle-income linüktem nungi lir.
India, Pakistan, China, Bangladesh, Madagascar aser Kenya ama industry kanga züinba linüktem nung asürtem shilem 4 nungi shilem kabo tzü-mopung menenba den sendaktepa lir, ta parnokisa metetdaktsü.
“2015 küm tzü-mopung menenba ajanga India (2.5 million) nung timba asü aser tanabubaji China (1.8 million) liasü,” ta study ajanga ashi.
Tzü aser mopung menenba ajanga küm shia alima nung nisung million 9 shi asür; Alima nung kuli balala ajanga nisung asüba asadangra shilem 16 shibo tzü-mopung menenba ajanga asüba lir.
Ano mapa inyakba tesem nung toxins aser carcinogens ajanga nisung million 0.8 shi asü aser parnok timbaka nagmati dak sendakba mapa inyakertem pneumoconiosis tashidak agi asü, dye industry nung inyakertem poktsütem cancer agi asüba aser tangartemji asbestosis, tepokpok cancer, mesothelioma aser tanga cancer balala agi asürtem lir.