Mopung menenba menokdangtetba atema SC-i ketdangsertem jaoker

New Delhi, Yimpoksüi/November 15 (Agencies): Mopung menenba menokdangtetba atema Supreme Court-i Delhi, Haryana, Punjab aser Uttar Pradesh state tem nungi Chief Secretary tem November 29, 2019 nü jaokogo; item state nungi chief secretaries ajaki court matsüngdangi aotsü.
Supreme Court-isa Punjab sorkar dang tamalen tuyuba ama aluyimertem nem temenok senotsü agütsür ma? ta asüngdang. Ajioda Punjab state sorkari, aluyimertem nem senotsü teyari crore 90 agütsüogo, ta langzü.
November 6, 2019 nü Supreme Court-i Uttar Pradesh, Haryana aser Punjab sorkartem dang aluyimertem alu arongtsü aser merüktettsü atema quintal shia sen 100 teyari agüjang ta tuyua liasü.
Supreme Court-isa, Delhi nung Odd-Even scheme yagi takok mangutsü, ajisüaka iba mapatong ajanga middle class kibongtem ang timtemer, kechiyong takartem bo odd-even number gari ajak lir, ta ashi.
Supreme Court-isa, Odd-Even scheme benoka aliba takar linüktem nungbo public transport angati agütsür, ajisüaka yangibo yamaji meinyaktettsü, ta ashi.
Supreme Court-isa Centre dang Delhi nung air purifier towers amenoktsü asüngdang.
Delhi sorkaribo odd-even scheme ajanga mopung menenba shilem 5-15 tajemba kümogo, ta ashir, ajisüaka Central Pollution Control Board (CPCB)-i iba scheme ajanga mopung menenba shilem 4 dang nungi tajemba kümdaktsür, ta ashi.