Mopung merüktsü atema naro tajungtem

Kilung nung asenoki memetetetba aser tenük agi manguba mesen den külemi lia alitsü akok. Iba ya koda sür ta asadangera, kima dang nungibo kilung nung aliba mopungji punguben agi temenenba, ta Environmental Protection Agency ajanga metetdaktsü.
Temang atema meputepba xylena (paint aser lacquer), benzene (furniture wax aser insect sprays), formaldehyde (upholstery aser air fresheners) aser trichloroethylene (cleaners aser adhesives) ajanga tekolak ngudaktsütsü, tango junga mesashitettsü aser terok nung timtem agütsütsü akok. Item chemical ajunga ya kilung nung amshiba mozütem lir koba ajanga mopung menentsür.
Tang NASA Clean Air Study bushisüngdangba ajanga ashiba agi, kilung nung mopung menenba merüktettsütsü (detox) atema kidang ayuba naro, naro (plant) kar ajanga teyari agütsür.
Item naro rongnung kar yamai alitsü:
1. Dwarf date palm : Iba naro (plant) ya mapang agia ainer saka plant ya junga shia iner külen putu jungnüa alir. Iba naro ya süklep 8 nungi 10 tashi ainer aser naro yagi mopung nung aliba xylene agientsür. Ki shia nung kima aser kilung tepor jungdaktsütsü atema pei sapuba rong sentsü balala anür aser item rong nungji xylene densema lir. Ibayongji, dwarf date palm naro ya kima mesüra ali tazüng nung atemtsü atema NASA-i ajunshir.
2. Kimberly queen fern : Kimberly queen fern plant ya Australia ama talem lima nung bulua adoker. Iba naro ya anü talem peria angudak ang ainer asünung anogoshia tzü agütsütsüla. Queen fern plant ya gari ayudak garage tesem nunger nung ayutsü junger koba ajanga xylene nokdanger.
3. Boston fern : Iba naro ya temekong jaka aser anü sashia mepulokba tesemtem nung adoker. Ibayongji, Boston fern ya bathroom nunger nung ayutsü junger koba ajanga naroi aginüba ama mopung temokong angur. Iba den külemi, boston fern plant yagi mopung nung xylene aser formaldehyde agientsür.
4. Spider plant : Mopung den meyokteper aliba carbon monoxide aser formaldehyde naprong agientsütsü atema Spider plant dak tashi lir. NASA bushisüngdangba ajanga ashiba agi, takdang telung nung spider plant yagi ghonda 24 nung mopung nung aliba formaldehyde shilem 95 tashi agientsür.
5. Chinese evergreen plant : Chinese evergreen plant ya tekalen agüja aliba plant tem ama kangarabo anepalua ayutsü menüngdaker. Iba plant ya living room table nung amendaka yutetter aser anü tesangwa peria malidak plant ya küm 10 tashi alir. Chinese evergreen plant ajanga kilung nung mopung den meyoktepa aliba benzene aser formaldehyde agientsür.
Source : Internet