Mopung tesashi kati Assam nung Cong ondoktsü: Modi

Rangapara (Assam), March 27 (Agencies): Deobarnü Ato kilonser, Narendra Modi-i, Assam nung mopung tesashi ka melenogo  aser iba mopungji ajanga Congress tera nungi atsüteta ondoktsü, ta ashi.
Tanü Rangapara nung Assam assembly election atema nüboyim lokti senden ka nung jembidang Modi-i, “Congress-i tesüiba küm 60 nung Assam atema kechi inyaktsü’ar parnoki ashitsüla. Kechiba iba tesem nung imlaba ama terenlok mali (?) Shibai Assam sensaker kümdaktsü (?) Nenok temeim melen ni Assam nung terenlok agütsütsü,” ta ashi.
“Congress manifesto tesüsabuba ponguji parnoki tamalen nangzüka aliba melenshiba dang. Itemji kata mataloktsü. Küm 15 tashi nisungtemi Congress dak tamang aka, saka parnoki nisungtem teimla ashioktsü,” ta pai ashi.
Modi-isa, “Bank kishitemji takartem atema lapoktsü. Bank nationalize asüdang parnoki, ibaji sensakertem atema lir ta ashi. Ajisüaka sensakertem sensakba kümogo. Ni mera takang agiogo aser ibaji ajanga bank dang nungi auyaba senji meyipa bener arutsü. Ni sensakertem atema bank kishi lapoktsüogo,” ta ashi.
“Onoki onük asem nung inyaker, aser ibaji- terenlok, terenlok kara agütsüba aser ajaklen terenlok,” ta Ato kilonserisa ashi.
Pai ashiba agi, “2022 küm tashi nungbo nisung ajak pei ki alitsü. Iba tesem terenlok atema onoki sen crore 2000 dak tema intoktsü.”
2014 Lok Sabha election nung nüburtemi BJP nem takok tulu ngudaktsü aser tangbo iIndia tenüng asanger, ta Modi-isa ashi.
“Nenoki Assam atema kasa tenüngsangji aginüra BJP aser teloktep party temi takok tulubalen angutsü atema vote agüjang,” ta ashi.