Mopungchuket nunger asangur ka zükset

Mokokchung, June 24 (TYO): June 23, 2017 aonung nisung anati Mopungchuket nunger Wb. Tiatoshi’er jabaso aser Kapayong Sector Mokokchung yim nung alir arishi küm 33 tain Sentilong zükset, ta police osang ka ajanga jangjaogo.
Iba maparen dak sentakba nung Longmisa nunger Yashirangba’er jabaso Alempang Ward Mokokchung nung alir, Zülutemjen (arishi küm 40) aser Ungma nunger Sangtemla Ward Mokokchung nung alir Akonükshi’er jabaso, Imtinungsang (41) na pua lir, ta Police osang ajanga metetdaktsü.
June 23 aonung 6:00 – 6:30 ako meta Mokokchung Sangtemla Ward S.I.B office anasa alir Moarenla’er kidang tasüsang Sentilong, Imtinungsang, Zülutemjen aser ano medemertem kar dena chiajemtepa kazüdang parnok tsüngda obang kar mapu adoka rara mena. Idangji ki kiburi lar kidang shinga teraratep ta sür parnokji meinzüka yok. Anungji, Imtinüngsang aser Zülutemjen nati Sentilong ji kimai anir orr azük, ta osang ajanga angazüker.
Aji sür, Imti aser Zülu den ano par medemer ka densema par asemi Alto gari ka nung tasüsang Sentilong ji Mokokchung IMDH (Civil Hospital) nung yutsür parnokbo jena oadok. Iba osangji angashia Police-i bushia aodang aonung 8:30 meta Sentilong mangji IMDH nung sür lia angu. Sentilong dakji azükba zübu kar keter liasü, ta Police osang ajanga metetdaktsü.
Tesü Police-i aibelena alisang Imtinungsang aser Zülutemjen naprong iba aonungjisa 11:30 meta Longmisa lushi nungi apu, ta police ajanga metetdaktsü. Aibelensang anaji tang police ket nung yua lir aser tena anema tim bushisüngdangba maparen tenzükogo, ta Police ketdangsürisa metetdaktsü.