Morales-i Guatemala Tir tasenba akümtsü jenjang angur

Guatemala City, October 26 (Agencies): Taoba mapang television sentong balala nung asayamenüa shilem agir, Jimmy Morales-i yashi Deobar nü agiba Tir election nung takok ngua Guatemala Tir tasenba akümtsü jenjang nguogo.

Taoba mapang yimtenren sabang nung shilem agia malisang, Morales-i vote noklang nung shilem 69 tashi ngua Guatemala linük Tir tasenba akümtsü jenjangji angu.

Taoba Guatemala Tir, Otto Perez anema okadak ochimashi inyakba ken o benokba sülen pai Tir menden toktsütsüsa aküm aser pa melenzüker shimtsü election nung Morales-i temaba jenjang tan angur lir.

National Front of Convergence (NFC) yimtenren telok nungi candidate ka ama election nung shilem agisang, Morales-i taküm 2015 April ita nungi tenzüka election nung tokteptsü maparen tenzükdang pa pusemer nütsüng yongsük noklang shilem nung shilem 5 dang liasü.

Aji oda, tang tepuokdak puoka alisang, Perez-i tenzükba ochimashibaren ajunga agientsü nangzüka par nüboyimtsü maparen tenzükba sülen Morales pusemer jenti küma pai tan election nung takok angur lir.

Bendanglen nungi ozüng alema osettsüset bener arutsü temelaba agütsütsü melena shishilembartem nungi süpokrem sen million aika agizüka agiba ken o tang Perez anema benoka lir.

Perez aser pa den külemi tepuokdak puoka aliba taoba Gutemala Tatong Tir, Roxana Baldetti naprongla nem dollar sen 800,000 agütsüba densema Perez-i tentetba süpokrem agitsü teloki May, 2014 nungi April, 2015 tashi nung dollar sen million 3.8 tashi agizüka agiba kuli ngutetba osang ka United Nations aser Guatemala prosecutor-temia metetdaktsüogo.