Moreh jila nung Rohingya nunger parnok pezü police-i apu

Imphal, Monupii (May) 2 (Agencies): Sangtennü nikongtsütsü Moreh jila nung Manipur police telok kati Rohingya nunger kuli kaket tejangja mebeni ozüng alema state-i aiter parnok pezü puogo.
Superintendent of Police (SP) Tengnoupal, Dr S Ibomcha Singh-i achaayanga DSP Moreh, Thomas Thokchom lenisüba kübok CDO Moreh team kati Moreh jila nung Gate no 2 anasa hotel ka meita aoba mapang nung Sangtennü nikongtsütsü 4:00 ako shi nungi ozüng alema aruba Rohingya nunger parnok pezü ya apu.
Police temi apuba Rohingya nunger parnok pezü ya Myanmar kübok Yakhai nung alir Warhussain’er chir Zober (21), Yakhai nung alirsa Md Adsama’er jabaso Rapik (19), maneni Yakhai nung alir Abutaher’er jabaso Kamal Hussain (19) aser Mohammad’er jala Munni Bibi (19), ta jangjaogo.
Imphal East kübok Lilong Urup Arapti Makha Leikai kübok alir Takhellambam Subol Singh’er jabaso, arishi küm 29 tain Takhellambam Gobin Singh-i Rohingya nungertem ya Moreh jilai ozüng alema shibelener aruba lir.
Bendangertem den ya külemi pa dena puogo.
Ozüng alema Manipur-i aiter Rohingya nunger parnok pezü den parnok shibelener arusang dena Moreh Police Station nung bendanga agütsüogo.
Kasa mapang nung police temi Rohingya nungertem dang ken o tejangja ashishi tenzükogo. Iba ken o dak sendakba nung ken o ka benokogo aser Moreh police-i iba tatalokba ajak ya bushisüngdang tenzükogo.